08 февраля 2017 г.
Район администрациĕн пуçлăхĕ Леонид Николаев ертсе пыракан ушкăн Рункă ялĕнче иртнĕ отчет пухăвне хутшăннă. Хирпуç ял тăрăхĕн пуçлăхĕ Валерий Терентьев пĕлтĕрхи ĕç-хĕле пĕтĕмлетнĕ. Ку ял тăрăхне 4 ял кĕрет. Вĕсенче 1558 çын пурăнать. Валерий Николаевич пĕлтернĕ тăрăх, 2016 çулта ял тăрăхĕнче 11 ача çуралнă, çав вăхăтрах 22 çын çут тĕнчерен уйрăлса кайнă. Демографи лару-тăрăвĕ Рункă тата Уравăш ялĕсенче лайăхрах.
Ял тăрăхĕн территорийĕнче 2 шкул, 1 ача сачĕ, 1 пĕтĕмĕшле врач практикин офисĕ, 2 фельдшерпа акушер пункчĕ вырнаçнă. Хирпуç ялĕнчи клубра юсав ĕçĕсем ирттернĕ. Çĕрпелпе Хирпуç хушшинчи çула юсанă.
Ял тăрăхĕн бюджечĕ пĕлтĕр 3,5 миллион тенкĕпе танлашнă. Бюджетăн пĕр пайне çул-йĕр çине яраççĕ.
Килсенчи йăлари каяшсене тата çÿп-çапа пуçтарса тухасси, пурăнакан вырăнсене тирпей-илем кĕртесси çивĕч ыйтусенчен пĕри. Çавăнпа та ялсенче пурăнакансен «Водоканал» организаципе килĕшÿ тумалла. Вĕсем пухăннă çÿп-çапа килсе илсе каяççĕ.
Район администрацийĕн пуçлăхĕ Леонид Николаев районăн пĕлтĕрхи социаллă-экономика аталанăвĕн кăтартăвĕсемпе паллаштарнă.
Рункăра пурăнакансене чылай ыйту интереслентернĕ. Ку ялти З.Васильева депутата фельдшерпа акушер пунктĕнче фельдшер çукки пăшăрхантарать. Çавăн пекех ФАПра юсав ĕçĕсем хăçан вĕçленесси пирки те ыйтнă. Район тĕп больницин тĕп врачĕ Николай Тинюков ялта яланлăха медицина ĕçченĕ кирлине, хальхи вăхăтра фельдшерпа акушер пунктне район тĕп больницинчен специалист килсе çÿренине пĕлтернĕ. Ыйту контрольте тăнине каланă. ФАПра вара юсав ĕçĕсем кăçал та малалла тăсăлĕç.
Çынсене ялтан райцентра çитме автобус маршручĕ çукки пăшăрхантарать. Ку тĕлĕшпе хальхи вăхăтра уйрăм предпринимательсемпе ĕçлеççĕ.
Район администрацийĕн пуçлăхĕ Л.Николаев тĕлпулу вĕçĕнче кил умĕнчи территорие тасалăхра тытма сĕннĕ, ыйтусене хуравланă.
К.ЮРЬЕВ.