08 февраля 2017 г.
Пĕтĕм Раççейри «Раççей йĕлтĕр йĕрĕ» массăллă чупу умĕн «Август» Фирмăн «Вăрнарти хутăш препаратсен завочĕ» филиалĕнче завод первенстви иртрĕ.
Йĕлтĕр çине заводра тимлекен 130 ĕçчен тăчĕ. Ÿсĕме кура вĕсем 1 тата 2 километрлă дистанцисенче тупăшрĕç.
Чи малтанах старта чи асли – наукăпа производство центрĕнче тăрăшакан Ильсеяр Антонова тухнă. Çак кун тивĕçлĕ канури ытти ветерансем те ăмăртăва хутшăнчĕç.
Çанталăкĕ те химиксем майлă пулчĕ. Ялавсем, баннерсем спорт уявĕн сĕмне ÿстерчĕç. Хăйсен цехĕнче, подразделенире ĕçлекенĕсене хавхалантаракансем чылай-йăн пулни те ăмăртăва хаваслăх кĕртрĕ.
Командăпа чи маттуррисем «Звездопад» филиалта ĕçлекенсем пулчĕç. Ун директорĕ Владимир Яковлев уйрăм зачетра çĕнтерÿçĕ пулса тăчĕ.
Иккĕмĕш вырăнта «Рубеж» хурал предприятийĕн, виççĕмĕшĕнче завод управленийĕн командисем.
Уйрăм зачетра хăйсен ÿсĕмĕнче çавăн пекех А.С.Иванов (ЧОП «Рубеж»), А.М.Исакова (ветеран), Н.В.Михайлова тата И.В.Ерлыгина («Звездопад»), З.В.Ананьева (завод управленийĕ), В.С.Титов (автотранспорт цехĕ), А.И.Савельева тата А.В.Лодская (180-мĕш цех), И.С.Логачев (102-мĕш цех) мала тухрĕç.
Людмила ИВАНОВА.