04 февраля 2017 г.
Библиотекарьшĕн тĕп тĕллев вăл – вулакана кĕнеке патне ытларах явăçтарасси. Ăна пурнăçа кĕртессишĕн мĕнлерех ĕçлесе пыраççĕ-ха вĕсем? Çак тата ытти ыйтусем çине районти тĕп библиотека тытăмĕн директорĕ Людмила Уткина хуравлать.
– Иртнĕ çул библиотекарьсемшĕн мĕнпе асра юлчĕ?
– 2016 çул паллă пулăмсемпе палăрса тăчĕ. Пĕлтĕр Раççейре Кино тата Чăваш енре ,ç çыннин çулталăкне халалласа чылай ĕçсем туса ирттерме тиврĕ. Вырăс классика тата хальхи литература произведенийĕсене, вырăс киновĕн актерĕсен пултарулăхне тишкересси, çавна май тĕрлĕ куравсем йĕркелесси малти вырăна тухса тăчĕ.
Вăрнар поселокĕнче пурăнакансемшĕн Раççейри Кино çулталăкне халалланă «Библиокаç – 2016» асра юлчĕ пулĕ тесе шутлатпăр. Вăл – «Кино вула!» девизпа иртрĕ. Отчетлă тапхăрти тепĕр пысăк ĕç – август уйăхĕнче пулнă «Кино каçĕ». Ку акцие нумай çынна явăçтарма май килчĕ.
Ĕç çынни пирки те манмарĕç библиотекарьсем. Çулталăк хушшинче мероприятисем час-часах ирттернĕ май, çамрăк ăрăва тĕрлĕ профессисем çинчен тăтăшах каласа пачĕç, ĕç ветеранĕсене чысларĕç. Çыннăн пĕтĕм пурнăçĕ ĕçпе çыхăннă. Çак девиза тĕпе хурса ĕçлерĕç те районти библиотекарьсем.
– Çынна кĕнекене ирĕксĕрлесе вулаттараймăн. Вулакана хăвăр пата мĕнле илĕртетĕр?
– Çулталăк тăршшĕпех районти библиотекарьсем вулакансемпе масăллă ĕçсем ирттерчĕç. Вĕсем историпе патриотизм воспитанийĕпе, таврапĕлÿ, экологи енĕпе нумай ĕçлерĕç, сывă пурнăç йĕркине те тĕпе хучĕç. Инновациллĕ формăсемпе те усă курчĕç, виртуаллă экскурсисем, электронлă презентацисем пурне те килĕшрĕç. Аслăрах çулсенчисене компьютерпа усă курма, Интернета кĕме вĕрентеççĕ. Эпир яланах сывлăх сыхлавĕн, культура, вĕрентÿ учрежденийĕсен ĕçченĕсемпе тата право хуралĕн органĕсемпе тачă çыхăнса ĕçлетпĕр.
2016 çулта районти библиотекарьсем 3017 массăллă мероприяти ирттернĕ, вăл шутра тĕп библиотекăра – 201. Вĕсене 42499 çын хутшăннă. Çак цифрăсем ĕç кăтартăвне çирĕплетсе параççĕ.
– Районти библиотекăсене çулталăкра миçе пин вулакан пынă?
– Пĕлтĕр структура енчен улшăнусем пулман, унчченхи çулсенчи пекех тытăмра пĕр тĕп библиотека тата ялсенчи хĕрĕх библиотека. Кĕнекесемпе вырăна тухса та тивĕçтеретпĕр. Ку енĕпе район центрĕнчи çирĕм организаципе çыхăнса ĕçлетпĕр.
2016 çулта районĕпе 26448 вулакана регистрациленĕ. Çулталăкра 519420 кĕнеке панă. Пĕлтĕр районти тĕп библиотекăра 7410 вулакана шута илнĕ. Çырăннисем хушшинче – тĕрлĕ çулсенчисем. Çамрăксем пурри вара питех те савăнтарать.
– Паянхи вулакана мĕнле литература ытарах интереслентерет?
– Кашни çыннăн кăмăлĕ тĕрлĕрен. Анчах та паянхи пурнăçпа тата юратупа çыхăннă кĕнекесем вулакана туртни палăрать. Лайăх кĕнеке пичетленсе тухрĕ – ăна пурте тÿрех асăрхаççĕ, илсе кайса вулаççĕ. Ман шутпа, литературăна пĕлмесĕр малалла кайма кансĕр. Лайăх кĕнекесем пурнăç тĕллевĕсене урăхла хаклама пулăшаççĕ. Юлашки вăхăтра литература нумай пичетленет. Çавăнпа та ăнăçлă кĕнеке суйласа илесси пĕртте çăмăл мар, вăл е ку кĕнекене сĕниччен библиотекарĕн ăна хăйĕн алла тытмалла. Унсăрăн вулаканпа кирлĕ çыхăну йĕркелеймĕн.
Юрий КОРНИЛОВ калаçнă.