04 февраля 2017 г.
Оборонăпа массăллă тата спорт ĕçĕн уйăхлăхĕ йĕркипе Туçи Çармăс шкулĕнче кунта физкультурникра тимленĕ Сергей Иванович Александрова асăнса йăлана кĕнĕ волейбол турнирĕ иртнĕ.
Ăмăрту сумĕ çулсеренех ÿссе пырать. Кăçалхипе пиллĕкмĕш хутчен йĕркелекенскере командăсем те йышлăрах хутшăннă. Арçынсен – çиччĕ, Çĕрпел, Вăрнар, Кÿстÿмĕр, Кив Сăрьел, Туçи Çармăс тата Канаш районĕнчи Ямаш çамрăкĕсем, хĕрарăмсен – пиллĕк, Çĕрпелти, Кÿстÿмĕрти, Санарпуçĕнчи, Вăрман Кипекри тата Ямашри вăтам шкулсен хĕрĕсем.
Вăйăсем Туçи Çармăс тата Вăрман Кипек шкулĕсен спорт залĕсенче иртнĕ.
– Командăсен представителĕсене, тренерсене – Александр Порфирьева (Санарпуç), Юрий Горбунова (Çĕрпел), Николай Афанасьева (Кÿстÿмĕр), Валерий Федорова (Вăрман Кипек), Владимир Петрова (Ямаш) пысăк тав сăмахĕ калатăп. Пĕр пĕччен кăна ăмăртăва ниепле те ирттерейместĕн. Пирĕн ентеше çапла хисеплени чĕрере хăват хушать. Сергей Александровăн тăванĕсем те савăнаççĕ. Унăн мăшăрĕ Ирина Александрова, ывăлĕ Александр, аппăшĕ Надежда Михайлова çак турнира ирттерме яланах пулăшаççĕ. Çавăн пекех Кĕçĕн Кипек ял тăрăхĕн администрацийĕ хавхалантарчĕ, – пĕлтерчĕ турнира йĕркелесе ирттерессине пысăк тÿпе хывакан Сергей Марков.
Хĕрсем те, каччăсем те ăмăртăва вăйлă хатĕрленнĕ. Çакна хĕрÿ вăйăсем аван кăтартса панă. Анчах та икĕ ушкăнра та чи вăйлисем çĕрпелсем пулнă.
Светлана ЧИКМЯКОВА.