01 февраля 2017 г.
Район администрацийĕн пухусем ирттермелли залĕнче хурт-хăмăрçăсен черетлĕ семинар-канашлăвĕ иртрĕ. Унăн ĕçне хурт-хăмăр ăстисемпе пĕрле «Агентство по пчеловодству» акционер обществин генеральнăй директорĕ, ял хуçалăх наукин кандидачĕ Г.Максимов, ял хуçалăх наукисен докторĕ И.Мадебейкин профессор, Вăрнарти ял хуçалăх техникумĕн вĕрентекенĕ Н.Васильев, район администрацийĕн тĕп эксперт-специалисчĕ Г.Романов хутшăнчĕç.
Семинар-канашлура район администрацийĕн пуçлăхĕн пĕрремĕш заместителĕ–ял хуçалăхĕпе экологи пайĕн пуçлăхĕ В.Горбунов хурт-хăмăр ĕрчетес ĕç çав тери кăткăс та сумлă пулнине палăртрĕ, иртнĕ çулхи çитĕнÿсемпе паллаштарчĕ. Канашлăва килнисем хурт-хăмăр ĕрчетекенсен умĕнче çут çанталăкри пысăк улшăнусене пула мĕнле йывăрлăхсем тухса тăни çинчен, вĕсене çĕнтерме мĕнле ĕçсем тумалли пирки сĕнÿсем пачĕç.
Вăрнарти ял хуçалăх техникумĕн директорĕ Ольга Львова ячĕпе кунта вĕрентекен Н.Васильев тачă çыхăнса ĕçлекен «Агентство по пчеловодству» обществăн генеральнăй директорне Г.Максимова, утарçă-фермера И.Федорова тата «Санары» агрофирма утарçине В.Ильина Тав çырăвĕсемпе чысларĕ.
Ятарлă комисси утарçăсен пылне хак пачĕç. Районти чи тутлă та паха пыл Вăрнарти ял хуçалăх техникумĕн пулнине палăртрĕç, утарçи – Николай Васильев. Иккĕмĕш вырăнта – Иван Федоров фермер-утарçăпа «Санары» агрофирма утарçи Василий Ильин. Виççĕмĕш вырăна Вячеслав Васильев (Кайри Тукай), Иван Михайлов (Кайри Тукай), Виталий Николаев (Вăрнар поселокĕ) йышăнчĕç. Çĕнтерÿçĕсене дипломсемпе чысларĕç.