01 февраля 2017 г.
Иртнĕ çул вĕçĕнче пирĕн ентешсем виççĕн харăс Наукăпа искусствăсен чăваш халăх академийĕн чăн членĕсем пулса тăнă.
Вĕсенчен пĕри – эпир пурте лайăх пĕлекен хисеплĕ çын Николай Кириллович Кириллов. Авруй çынни. Ветеринари наукисен докторĕ, профессор, аслă шкул наукисен пĕтĕм тĕнчери академийĕн, экологи хăрушсăрлăхĕн тата çутçанталăкпа усă курас пĕтĕм тĕнчери академийĕн академикĕ. Хусанти ветеринари институтĕнче вĕреннĕ вăхăтра 1973 çулта Берлинта иртнĕ студентсемпе çамрăксен Пĕтĕм тĕнчери фестивальне хутшăнма тивĕçнĕ. Нумай çул Чăваш патшалăх ял хуçалăх академийĕнче тĕрлĕ должноçсенче ĕçленĕ, 1991–2012 çулсенче – ку аслă шкулăн ректорĕ.
Николай Кирилловичăн сумлă тивĕçĕсем тата чылай. Вăл – наука шкулне йĕркелекенĕ. 400 ытла наука ĕçĕн авторĕ, 17 патент тата автор свидетельствисем пур. Вăл – Раççей агропромышленность комплексĕн хисеплĕ ĕçченĕ, Чăваш Республикин тата Раççей Федерацийĕн аслă шкулĕн тава тивĕçлĕ ĕçченĕ. Ытти наградăсем нумай.
Тепĕр академикăн та – Николай Георгиевич Игнатьевăн – пурнăçĕ ветеринарипе çыхăннă. Биологи наукисен докторĕ, профессор. Хусанти ветеринари институтĕнче вĕреннĕ, кунтах аспирантура пĕтернĕ. Ĕç-хĕлĕ йăлтах Чăваш патшалăх ял хуçалăх академийĕпе çыхăннă, тĕрлĕ çулсенче – кафедра доценчĕ, декан, кафедра заведующийĕ, куçăмсăр вĕренĕвĕн проректорĕ. 100 ытла наука ĕçĕсен авторĕ. Чăваш Республикин наукăсен тава тивĕçлĕ деятелĕ.
Николай Георгиевич Кив Мĕлĕшре çуралса ÿснĕ.
Виççĕмĕш академика — Вениамин Иванович Сорокина – «Çĕнтерÿ çулне» вулакансем аван пĕлеççĕ. Çак çулсенче вăл район çыннисене кăсăклă повеçсемпе, сăвăсемпе чылай савăнтарчĕ. Чăваш Республикин Писательсен союзне кĕме пултарчĕ. Икĕ кĕнеке авторĕ – «Шуçăм сăввисем» тата «Кашкăр çулĕпе».
Мăн Явăш ялĕнче çуралнă. 1967–2000 çулсенче Вăрнарти пичет çурчĕн директорĕ. Чăваш Республикин промышленноçăн тава тивĕçлĕ ĕçченĕ. СССР пичет отличникĕ. Хисеп хучĕсем чылай. Профессипе – ученăй-агроном.
Пирĕн районтан ку хисеплĕ ята унччен илнисем тата пур.
Светлана ЧИКМЯКОВА.