01 февраля 2017 г.
Мăньял Хапăсăн çамрăк йĕлтĕрçисем – Настьăпа Валентина Тикиневасем – февралĕн 7–12-мĕшĕсенче Чăваш ен чысне Архангельск облаçĕнче пулакан Раççей первенствинче хÿтĕлĕç.
Çак чыса пĕртăвансем Чăваш енри йĕлтĕр чупăвĕсенчи нумай хутченхи çĕнтерĕвĕпе тивĕçнĕ. Канмалли кунсенче те акă вĕсем республикăри ăмăртура, Олег Кусков тата Сергей Светлаков парнисемшĕн иртнĕскерте, çĕнтерÿ пьедесталĕ çине хăпарма тивĕçнĕ. 2003 – 2004 çулсенче çуралнă хĕрсем хушшинче икĕ километрлă дистанцие Настя пĕрремĕш, Валентина иккĕмĕш вĕçленĕ.
Ку чупăва Вăрнар районĕн ытти йĕлтĕрçисем те хутшăннă. Владимир Скворцов, Галина Тикинева, Юрий Сергеев, Роман Михайлов, Михаил Скворцов чи вăйлă вунă спортсмен йышне кĕнĕ. Святогор Петров финиша вунвиççĕмĕш, Юрий Петров вунпиллĕкмĕш çитнĕ.