28 января 2017 г.
Кăрлачăн 21–22-мĕшĕсенче Мускавра «Единая Россия» партин XVI съездчĕ пулни çинчен пĕлтернĕччĕ. Унăн ĕçне çĕршыври 728 делегат тата 2000 ытла хăна хутшăннă. Çак йышра Чăваш ен делегацийĕ те пулнă. Вăл шутра Вăрнар районĕнчи Аçăмçырми ял библиотекин библиотекарĕ Надежда Михайлова та.
Надежда Геннадьевна «Единая Россия» партин Аçăмçырминчи пуçламăш уйрăмĕн секретарĕнче 2003 çултанпа тимлет.
– Делегата мана суйланăшăн, ăнсăртран пулин те, чунтан хĕпĕртерĕм. Съездăн пĕрремĕш кунĕнче дискусси площадкине хутшăнтăмăр. Эпир Элĕк район делегачĕпе культура енĕпе иртнĕ ушкăнра пултăмăр. Съездра ялсенче культура учрежденийĕсене аталантарма укçа-тенкĕ уйăрасси çинчен калани кăмăла кайрĕ. Вĕсене пула пирĕн районти клубсемпе библиотекăсене те çĕнетес шанăç пур. Тăрăшса ĕçлемелле кăна, – пĕлтерчĕ Надежда Михайлова.
Мускаври съездра çавăн пекех Шăмăршă, Елчĕк, Патăрьел, Элĕк, Шупашкар районĕсен делегачĕсем пулнă.
Надежда Геннадьевна ял библиотекинче 1996 çултанпа тимлет. Вулакансене явăçтарас тĕллевпе хăй те, клубпа пĕрле те тĕрлĕ мероприятисем ирттерет. Çав вăхăтрах вăл партин пуçламăш уйрăмĕн ĕçĕсене те кăтартуллă ертсе пырать.
Пĕлтĕр партин Мускаври юбилейлă съездне Сăкăтри пуçламăш уйрăмĕн секретарĕ Ольга Карпова хутшăннăччĕ.
Светлана Чикмякова.