28 января 2017 г.
Çĕр пулăхне ÿстересси кашни хуçалăхшăн тĕп тĕллев пулмалла. Çавăнпа та удобренисемпе усă курасси яланах малти вырăнта тăмалла.
Пирĕн районта 2015 çулта Чăваш проекчĕпе шырав центрĕ 42922 гектар çинче агрохими тĕпчевĕ ирттернĕ. Унта сухалакан çĕрсем, улăх-çаран, нумай çул ÿсекен курăксем кĕнĕ. Çав шутран 10093 гектарĕ йÿçек çĕрсем шутланаççĕ. Районта фосфортан чухăн çĕрсем 11410 гектар. Калипе чухăн çĕрсем 23388 гектар.
Иртнĕ çул районĕпе известь çăнăхĕпе 226 гектар çинче усă курнă. Çак ĕçсене «Санары» агрофирма 156 гектар, Карл Маркс ячĕллĕ хуçалăх 70 гектар çинче пурнăçланă. Ăçта çĕр йÿçеклĕхĕ пысăк, çав уйра пысăк тухăç илейместĕн, мĕншĕн тесен тăпрара кальципе магни сахал, водородпа алюмини, марганец катионĕсем нумай. Çавăнпа та çав уйсене известь çăнăхĕ сапмалла. Известь тăпраран водород ионĕсене хĕссе кăларать, органикăллă кислотасен вăйне пĕтерет, çакăн хыççăн кальци, магни катионĕсем вăй илеççĕ, тăпраран тутлăхлă япаласене илсе тăраслăхĕ ÿссе каять.
Çĕр пулăхĕ минераллă удобренисемпе пĕлсе усă курнинчен нумай килет. Пĕлтĕр пĕтĕмпе 11858 центнер удобрени хывнă. Кашни гектар сухалакан çĕре районĕпе 42 килограмм тивнĕ. Ял хуçалăх кооперативĕсемпе илес пулсассăн: «Санары», «Янгорчино», «Мураты», Карл Маркс ячĕллĕ хуçалăхсене тата Вăрнарти аш-какай комбинатне палăртмалла. Фермер хуçалăхĕсенчен В.Павловпа А.Игнатьева асăнмалла.
Пĕр килограмм минераллă удобрени хывни тыр-пул тухăçне 3–5 килограмм, çĕрулминне 30–40 килограмм ÿстерме пулăшать.
Кăçал çуракинче тăпрана хывса хăварма минераллă удобренисем 2900 тоннăран кая мар туянмалла. Паянхи куна Вăрнарти аш-какай комбиначĕ 1610 тонна, «Мураты» хуçалăх 301 тонна, Карл Маркс ячĕллĕ хуçалăх 180 тонна, «Санары» агрофирма 188 тонна, «Янгорчино» хуçалăх 160 тонна, «Победа» хуçалăх 76 тонна, А.Игнатьев фермер хуçалăхĕ 60 тонна кÿрсе килнĕ. Районĕпе илсен кăтарту – 2575 тонна. Ку вăл 89 процент туяннине пĕлтерет. Удобренисене апат-çимĕç фончĕ урлă е заводсенчен хăйсенчен илме пулать. Çавăнпа та çак кунсенче хуçалăхсен, картограммăпа килĕшÿллĕн, кашни уя хăш удобрени тата мĕн чухлĕ кирлине тĕплĕн палăртмалла. Пĕр гектар çĕре те удобрени хывмасăр хăварас марччĕ.
Г.МИХАЙЛОВ,
патшалăх бюджет организацийĕн
«Чувашский» агрохими службин центрĕн
Вăрнар районĕнчи тĕп агрохимикĕ.