25 января 2017 г.
Керчь кĕперне тунă çĕрте вăйлă та тĕреклĕ, пултаруллă çынсем ĕçлеççĕ иккенне пурте пĕлетпĕр. Ку пысăк стройкăра Хирпуç çыннисем те вăй хураççĕ. Крым кĕперне тăвакансен 41-мĕш отрядĕнче çаксем ĕçлеççĕ: Вячеслав Григорьев, Михиал Волков, Михаил Аникин, Эдуардпа Юрий Александровсем, Владимирпа Николай Давыдовсем.
Çĕнĕ çулта Вячеслав Григорьевпа тĕл пулса калаçма тÿр килчĕ. Вăл акă мĕн каласа пачĕ.
– Пирĕн отряд Таминь çур утравĕ çинче ĕçлет. Çирĕп юпасене тĕрлĕрен конструкцисемпе çыхăнтаратпăр. Талăкĕпе пĕр чарăнмасăр ĕç вĕресе тăрать. Строительсен хули – «Модуль». Унта пĕр пÿлĕмре улттăн е саккăрăн пурăнатпăр. Пĕр уйăх ĕçлетпĕр те пĕр уйăх канатпăр. Крым кĕперне тума пуçланăранпах вăй хуратпăр, февральте çулталăк çитет.
Вячеслав Витальевичăн мăшăрĕ Вăрнарта ĕçлет, ывăлĕ çар служби хыççăн Хусанти авиаци институтне вĕренме кĕнĕ, кăçал бакалавр дипломне хÿтĕлемелле. Хĕрĕ те Хусанта пурăнать.
Ираида ФЕОФАНОВА.