25 января 2017 г.
Тăван çĕршыв хÿтĕлевçисен кунне тата Совет халăхĕ Тăван çĕршывăн Аслă вăрçинче Çĕнтерÿ тунăранпа 72 çул çитнине халалласа Чăваш Республикинче январĕн 23-мĕшĕнчен пуçласа февралĕн 23-мĕшĕччен Сыхлăхпа хÿтлĕх тата спорт енĕпе массăллă ĕçсен уйăхлăхĕ иртет. Вăл çамрăк ăрăва патриотизмла воспитани парас тата физкультурăпа спорта аталантарас, сывлăха çирĕплетес, çамрăксене çар службине хатĕрленме пулăшас, тÿсĕмлĕхĕпе чăтăмлăх пахалăхĕсене вăйлатас тĕллевлĕ.
Тунтикун уйăхлăха Хапăсри вăтам шкулта савăнăçлăн уçрĕç. Вĕренекенсене Вăрнар район администрацийĕн вĕрентÿпе çамрăксен политикин пайĕн пуçлăхĕ Маргарита Тихонова тата тĕп специалисчĕ Галина Виноградова вĕренекенсене саламлама çитнĕ. Шкул директорĕ Оксана Жебелевская çак тапхăрта туса ирттерме палăртнă ĕçсемпе паллаштарчĕ. Планпа Сывлăх кунне, стройпа юрă смотрне, патриотизмла класс сехечĕсене тата ытти мероприяти ирттерме палăртнă. Çамрăк волонтерсем ветерансене пулăшас ĕçе малалла тăсĕç. Районта иртекен спорт ăмăртăвĕсенче те Хапăс шкулĕн ачисем хăйсене кăтартма хатĕр.
Вĕрентÿпе çамрăксен политикин пайĕн пуçлăхĕ М.Тихонова 2015 çулхи октябрĕн 29-мĕшĕнче çамрăк ăрăва воспитани парас тĕллевпе Раççей Президенчĕ Владимир Путин Пĕтĕм Раççейри ачасемпе çамрăксен «Раççейри шкул ачисен юхăмĕ» организацийĕ йĕркеленни çинчен алă пуснă указ пирки каларĕ. Çак юхăм çамрăксене çар службине хатĕрлессипе ĕçлекен пĕтĕм организацисемпе органсене пĕрлештермелле. Юхăма пур шкул ачи те, клубсемпе отрядсем те кĕме пултараççĕ.
Г.Виноградова та «Юнармия» çарпа патриотизм юхăмĕ пирки ăнлантарчĕ. 2016 çулхи октябрь вĕçĕ тĕлне ун участникĕсен шучĕ 26000 пине çитнĕ. Вăрнар районĕнче «Юнармия» юхăма 6 шкул отрячĕ кĕнĕ. Уйăхлăх вĕçĕнче ун йышĕнче Хапăс шкулĕн вĕренекенĕсем те пулĕç.
Савăнăçлă линейка вĕçĕнче М.Тихонова баскетбол енĕпе районти ăмăртура çĕнтернĕ Хапăс шкулĕн арçын ачасен командине тата 2-мĕш вырăна тухнă хĕрачасен командине грамотăсемпе тата медальсемпе чысларĕ.
Сыхлăхпа хÿтлĕх тата спорт енĕпе ирттерекен массăллă ĕçсен уйăхлăхĕ уçăлнине халалланă линейкăна учительсемпе ачасен юррисем те илемлетрĕç.
Лариса ХАРИТОНОВА, чăваш чĕлхи учителĕ.