25 января 2017 г.
Район спортсменĕсен иртнĕ эрнере те канма вăхăт пулмарĕ.
Йĕлтĕрçĕсем Шупашкарта О.Сапожников предпринимателĕн парнисемшĕн иртнĕ чупăва хутшăннă. Мăньял Хапăсри Владимир Тикиневпа Вăрманкасри Эльвира Чугунова тата Вăрнарти Татьяна Белова унта чемпионсем пулса тăнă. Ăмăртăва çавăн пекех Николай Сазонов, Александр Политов, Сергей Политов тата Сергей Киселев та хутшăннă. Шел, вĕсем призлă вырăна лекеймен.
Мăньял Хапăсри Тикиневсен çемйи вырсарникун Чăваш ен Пуçлăхĕн Михаил Игнатьевăн парнисемшĕн йĕлтĕрпе çемье эстафетинче ăмăртнă. Пĕтĕм Раççейри хĕллехи ял спорт вăййисен участникĕ, республикăн темиçе хутчен те чемпионĕ пулнă май, Надежда Тикиневана мĕнпур участника саламлама тивĕç панă. Чупура пирĕн ентешсем тăваттăмĕш вырăн йышăннă.
Чăваш ен Пуçлăхĕн Кубокĕшĕн шкул ачисем хушшинче пыракан «Ылтăн шайба» республика спартакиади йĕркипе районăн çамрăк хоккеисчĕсем эрнекун Канаш район командине парăнтарнă. Виçĕмкун Элĕк район командине 6:0 шутпа çĕнтернĕ. Вăйăсем малалла пыраççĕ.
Футболистсем те лайăх результатсемпе палăрнă. Вăрнарти 2-мĕш вăтам шкул команди (2003–2004 çулсенче çуралнисем) мини-футбол енĕпе республика первенствин Етĕрнере иртнĕ вăййинче хăйсен ушкăнĕнче пĕрремĕш пулнă. 2001–2002 çулсенче çуралнисен команди вара республика первенствин çĕнтерÿçи пулса тăнă. Вĕсем республика чысне Атăлçи федераци округĕнче хÿтĕлĕç. Ярмушка шкулĕн футболисчĕсем вара Шупашкарта 2-мĕш вырăна тухнă.
Хĕрарăмсен волейбол командин Чăваш ен чемпионачĕ йĕркипе шупашкарсемпе тĕл пулнă. Шел те, вăйă пирĕн ентешсем майлă вĕçленмен.
Светлана ЧИКМЯКОВА.