21 января 2017 г.
Вăрнар районĕнче паянхи куна хĕрарăмсен 18 пуçламăш организацийĕ ĕçлет. Районти уйрăм хастар 30 хĕрарăма пĕрлештерет. Ун йышĕнче – вĕрентÿ, сывлăх сыхлавĕ, культура ĕçченĕсем, кил хуçи хĕрарăмĕсем, предпринимательсем, соцработниксем. Чи кĕçĕнни 25-ре, чи асли 80-ра.
Хĕрарăмсен районти канашĕ çемьесене çирĕплетессипе, ун статусне ÿстерессипе чылай тимлет, тĕрлĕ мероприятисем йĕркелет. Хĕрармăсен кунĕ умĕн акă централизациленĕ Библиотека системинче канаш членĕсем тата библиотека ĕçĕн ветеранĕсем хутшăннипе «Хĕрарăм ĕмĕчĕ – ĕмĕтри хĕрарăм пуласси» уяв иртрĕ.
Апрельте хĕрарăмсен канашĕ «Эпир таса поселокшăн» экологи акцине пуçарчĕç, ача-пăча площадкисене тата Вăрнарăн темиçе урамне çÿп-çапран тасатрĕç, клумбăсене йĕркене кĕртрĕç.
Аслă Çĕнтерÿ кунĕ умĕн Тăван çĕршывăн Аслă вăрçин участникĕсемпе тата тыл ĕçченĕсемпе тĕлпулусем, асăну каçĕсем, куравсем тата ытти мероприяти ирттернĕ. Район администрацийĕ тата ял поселенийĕсем пулăшнипе темиçе çул ĕнтĕ «Ветеран юнашарах пурăнать» акцие хутшăнатпăр, ун йĕркипе ветерансене килĕсерен çитсе саламлатпăр.
Йышлă çемьери ачасем хутшăннипе «Хаваслă стартсем», аслă ÿсĕмри çынсем валли спорт мероприятийĕсем йĕркеленĕ. Май уйăхĕнче Ашшĕсен канашĕпе пĕрле «Сывă кĕлеткере – сывă ăс-тăн» сывлăх кунĕнче ÿт-пĕве пиçĕхтертĕмĕр.
Пĕтĕм тĕнчери çемье кунĕнче ют çемьене хÿтлĕхе илнĕ ачасемпе усрав амăшĕсене, нумай çул пĕрле пурăнакан мăшăрсене уява пуçтартăмăр. Ачасене хÿтĕлемелли пĕтĕм тĕнчери кун, Çемье, юрату тата шанăçлăх кунĕ, Ашшĕ кунĕ вăйă-кулăра иртрĕ.
Хĕрарăмсен канашĕн членĕсем суйлавсенче та хастар. Çĕнĕ çул умĕн тăваттăмĕш çул ĕнтĕ «Ачана уяв парнеле!» акци йĕркелетпĕр, Çĕнĕ çул елкисем ирттеретпĕр.
Çула çитменнисем преступлени тăвассине асăрхаттарассипе те рейдсене тухатпăр, ачисене тивĕçлĕ пăхман ашшĕ-амăшне тĕрĕслесех тăратпăр.
Районти хĕрарăмсен канашĕ çивĕч ыйтусене малашне те чăн ĕçсем урлă татса парĕ. 2017 çула мероприятисен планне çирĕплетнĕ.
Вера Васильева,
хĕрарăмсен районти уйрăмĕн председателĕ.