18 января 2017 г.
Раççей пичет кунне тата Чăваш пичет кунне халалласа ирттернĕ Шупашкарти уявра çак сăмахсем нумай-нумай хутчен янăрарĕç
Чăннипех те, паян республикăра ырă ĕçлĕ пулăмсем чылай пулса иртеççĕ, ĕç çыннисем чылай-чылай конкурсра палăраççĕ... Вĕсем пирки халăх чи малтанах массăллă информаци хатĕрĕсем урлă пĕлет.
Паллах, информацие халăх патне мĕнлерех çитерни те пĕлтерĕшлĕ. Журналистсемпе полиграфистсене саламланă май, Чăваш ен Пуçлăхĕ Михаил Игнатьев сăмах вăйĕпе халăх хăтлăхĕшĕн усă курмаллине аса илтерчĕ.
– Массăллă информаци хатĕрĕсенче пултаруллă, таса чунлă, харпăр хăй ĕçĕшĕн хыпса çунакан, чăн-чăн патриотсем ĕçлени пĕлтерĕшлĕ, – терĕ вăл.
Михаил Игнатьев ку çул журналистсене çĕнĕ темăсем çине ытларах тимлĕх уйăрма ыйтрĕ. Ку вăл – Чăваш енри Амăшĕпе Ашшĕн, Раççейри Экологи çулталăкĕ. Чăн-чăн ĕç çыннисем çинчен каласа кăтартни çамрăк ăрăва Тăван çĕршыва юратма, ĕçе хисеплеме вĕрентессинче пысăк вырăн йышăнать. «Пирĕн пĕрмаях çÿлтен ыйтса ларакан мар, республика хăтлăхĕшĕн хăйĕн тÿпине хывма пĕлекен ăру çитĕнтермелле», – терĕ вăл.
Массăллă информаци хатĕрĕсен иртнĕ çулхи ĕç-хĕлне Чăваш ен информаци политикин министрĕ Александр Иванов пĕтĕмлетрĕ. Кăтартуллă цифрăсенче вăрнарсен «Çĕнтерÿ çулĕ» хаçачĕн тÿпи те пур. Район хаçачĕ улттăмĕш хут Раççейĕн «Прессăн ылтăн фондне», çĕршыври социаллă пĕлтерĕшлĕ изданисен переченьне кĕнĕ, тиража чакарман. Министр лайăх ĕçшĕн тав тунă май, малашне тата пысăкрах çитĕнÿсем тума сунчĕ.
Професси уявĕ яланхиллех наградăсемпе пуян пулчĕ. Сцена çине пирĕн ĕçтеш те – производство пайĕн пуçлăхĕ Ирина Андреева та хăпарма тивĕçрĕ. Александр Иванов министр ăна Чăваш Республикин информаци политикин тата массăллă коммуникацисен министерствин Хисеп грамотипе чысларĕ.
Отрасль ĕçченĕсене çавăн пекех официаллă ытти çынсем те саламларĕç, пултарулăх ушкăнĕсем концертпа савăнтарчĕç.
Чаплă уява районти «Çĕнтерÿ çулĕ» хаçат коллективĕ, пичет ветеранĕсем, район администрацийĕн ĕçченĕсем хутшăнчĕç.
Светлана ЧИКМЯКОВА.