18 января 2017 г.
Ку канмалли кунсенче район спортсменĕсем каллех тĕрлĕ ăмăртусенче тупăшнă
Çăмăл атлетикăра
Сумлă ăмăртусенчен пĕри – çăмăл атлетика енĕпе Раççей Гран-Прин хĕллехи тапхăрĕпе иртнĕ Чăваш ен Пуçлăхĕн Кубокĕ. Тĕрлĕ облаçпе регион спортсменĕсемпе пĕрле республика чысне хÿтĕлесе унта Вăрнар район спортсменкисем те хутшăннă.
Çĕрпел хĕрĕ Екатерина Ишова (Горбунова) элита ушкăнĕнче 3000 метра чи лайăх результатпа вĕçленĕ – ылтăн медале тивĕçнĕ. Шел, Аçăмçырми хĕрĕ Татьяна Ефимована финалта призерсен йышне кĕме вăй çитмен. Юниорсем хушшинче Кÿстÿмĕр хĕрĕ Диана Политова маттур пулнă, 1500 метра вăл виççĕмĕш результатпа вĕçленĕ.
Йĕлтĕр тупăшăвĕнче
Эрне вĕçĕнче йĕлтĕрçĕсем те республика первенствипе чемпионатĕнче кĕрешнĕ. Çитĕнĕвĕпе тÿрех мухтанас килет – юлашки 25 çул хушшинче Вăрнар район команди унта пуçласа 1-мĕш вырăн йышăннă!
Çак çитĕнĕве Вăрнарăн тĕрлĕ ÿсĕмри хастар йĕлтĕрçисем сумлă тÿпе хывнă. 2001–2002 çулсенче çуралнă хĕрсем хушшинче Çĕн Сăрьелти пĕртăван Зайцевасем Ленăпа Зоя дистанцие 2-мĕш тата 3-мĕш вĕçленĕ. Хĕрарăмсем хушшинче Вăрнар поселокĕнчи Татьяна Белова 10 километрта бронза призер пулса тăнă. Ку дистанцирех юниорсем хушшинче Уйкас Юнтапа хĕрĕ Ольга Хемницер пĕрремĕш, Вăрнар каччи Андрей Петров виççĕмĕш вырăнсене йышăннă.
Иккĕмĕш кунне классика стилĕпе Еленăпа Зоя Зайцевасем каллех çивĕчлĕх кăтартнă, финиша 1-мĕш тата 2-мĕш çитнĕ. Мăньял Хапăс хĕрĕ Валентина Тикинева 3 километрта 2-мĕш пулнă. 5 километрлă дистанцире Татьяна Белова каллех бронза медале тивĕçнĕ.
Ытти спортсменсем – Галина Павлова (Вăрнар), Эльвира Чугунова (Вăрманкас), Дарья Титова, Владимир Саватеев (Çавалкас), Владимир Тикинев, Владимир Скворцов, Анастасия Тикинева (Мăньял Хапăс) – призлă вырăнсене лекеймен пулин те çав тери аван ăмăртнă, вĕсем — чи вăйлă вунă спортсмен йышĕнче.
Кĕрешÿре
Кĕрешÿçĕсен те мухтанмалли пур. Иртнĕ шăматкун вĕсем Хĕрлĕ Чутайра иртнĕ республикăн уçă турнирне хутшăннă.
Чемпионсем виççĕн – Никита Львов тата Юрий Николаев (Вăрнар), Антон Федоров (Санарпуç). Дмитрий Львовпа Милена Федорова, Вăрнар çамрăкĕсем, кĕмĕл медальсене тивĕçнĕ. Никита Александров (2-мĕш шкул) тата Алексей Антоновпа Александр Васильев (Санарпуç) виççĕмĕш вырăнсене йышăннă.
Светлана ЧИКМЯКОВА.