30 декабря 2016 г.
Юнкун Вăрнарта Раççей Патшалăх Думин депутачĕн Леонид Черкесовăн парнисемшĕн йĕлтĕрпе чупассипе районсем хушшинчи ăмăрту иртнĕ. Старта Вăрнар, Йĕпреç тата Элĕк районĕсенчи вунпилĕк команда тухнă.
Саламланă май, Леонид Черкесов депутат та, район администрацийĕн пуçлăхĕ Леонид Николаев та йĕлтĕр тусĕсене спортпа çывăх пулнишĕн тав тунă.
Депутатăн Тав çырăвне Калининăри вăтам шкулти физкультура учителĕ Александр Михайлов тата районти спорт юхăмне аталантарассине пысăк тÿпе хывнăшăн Рифкат Киметов тивĕçнĕ.
Вăрнар район спортсменĕсенчен чылайăшĕ çĕнтерÿ пьедесталĕ çине тăма тивĕçнĕ. Харпăр хăй ÿсĕмĕнчи чемпионсем: Ольга Скворцова, Юрий Петров, Кирилл Кумруков (Аçăмçырми), Софья Клементьева, Данил Павлов (Ярмушка), Анастасия Тикинева, Владимир Скворцов (Хапăс), Валентина Тикинева (ДЮСШ).
Вăрнарти 1-мĕш шкулти Никита Леонтьев, Хапăсри Мария Гусева, Юля Шляпкина, Михаил Скворцов, Хăмăшри Ксения Иванова, Калининăри Святогор Петров, спорт шкулĕнчи Юрий Сергеев иккĕмĕш вырăнсене йышăннă.
Вăрманкасри Кира Ченчукова, Вика Петрова, Кристина Козлова, Аçăмçырминчи Артем Сергеев, Светлана Матвеева, Кульцаври Наталья Кузякова, 1-мĕш шкулти Роман Михайлов, Туçи Çармăсри Максим Волков бронза призерсем пулса тăнă.
Аслисем хушшинче Сергей Киселев, Галина Павлова, Андрей Ишмулин, Николай Созонов (Вăрнар), Ирина Петрова (Шăхаль) тата Владимир Тикинев (Мăньял Хапăс) палăрнă.