19 ноября 2016 г.
Вăрнар каччин Андрей Львовăн спортри çитĕнĕвĕсемпе вăрнарсене паллаштарсах тăратпăр. Нумаях пулмасть вăл каллех спорт туризмĕпе Пĕтĕм Раççейри «Гонки четырех» ăмăртура палăрнă.
Арçынсен команди – Андрей Львовпа Сергей Кузнецов спорт мастерĕсем, Андрей Беловпа Семен Машанов спорт мастерĕн кандидачĕсем – тăваттăмĕш класлă дистанцире кĕмĕл медаль çĕнсе илнĕ. Вĕсен çакăнса тăракан каçăма парăнтарма, чалăшшăн çакăнса тăракан каçăмпа анса хăпарма, паралельлĕ шăчăсем тăрăх утса каçма, вертикальлĕ маятникпе каçма, ориентированире палăрма тивнĕ.
Иккĕмĕш кунне кунашкал ăмăртусен вунă тапхăрне тухма тивнĕ вĕсен. Кунта чăваш каччисене çитекен пулман.
Нумаях пулмасть Андрей çуран дистанцире Мускав Кубокĕнче те палăрнăччĕ. Масс-стартра вăл çĕнтерÿçĕне пĕр çеккунт кăна выляса янă.