12 ноября 2016 г.
«Çĕнтерÿ нихăçан та çăмăллăн пулмасть. Çĕнтерÿ вăл – тар та, юн та, тепĕр чухне – куççуль те. Анчах та чăн-чăн арçын пулас тесен ун витĕр тухмаллах», – терĕ «Август» компанин генеральнăй директорĕ Александр Михайлович Усков, «Футбол – больше, чем игра» уявра тухса каланă май.
«Август» компани – «Химик» спорт клубĕн титуллă спонсорĕ. Кăçал ун аталанăвне 9 млн тенкĕ уйăрнă.
Футбол сезонĕ вĕçленсен çулсеренех пĕтĕмлетÿсем тăваççĕ. Кун пек чухне статистикăпа çеç çырлахмаççĕ, вăл чăн-чăн хаваслă уява çаврăнать. Уявлама сăлтавĕ те пур. Кашни сезонрах футбол командисем çитĕнÿсен енчĕкне çĕнтерÿпе тултараççĕ. 2016 çул та ăнăçлă пулчĕ. «Химик-Август» команда зачетĕнче – республикăра 1-мĕш вырăнта.
«Химик-Август» футболисчĕсене чăн-чăн спорт паттăрĕсем пек чысларĕç. «Пирĕн пек нумай командăллă спорт клубĕсем республикăра урăх çук. Республика первенствипе чемпионачĕсенче Вăрнар тата «Химик» спорт клубĕн чысне сакăр команда хÿтĕлерĕ. Спорт клубне çÿрекенсен йышĕ çулсеренех ÿссе пырать. Кунта халĕ 170 ача çÿрет», – терĕ «Химик» спорт клубĕн председателĕ Евгений Анатольевич Захаров.
Кунти ĕçсем çÿллĕ шайра пынине командăсен çитĕнĕвĕсем те аван кăтартаççĕ. 2016 çулхи футбол сезонĕнчи кăтартусем çапла: «Химик-Август» ачасем – 1-мĕш вырăн, «Химик-Август» кĕçĕн ачасем – 3-мĕш вырăн, «Химик-Август» аслă каччăсем – 3-мĕш вырăн тата Чăваш ен Кубокĕ, «Химик-Август-2», иккĕмĕш дивизион – 1-мĕш вырăн, «Химик-Август», аслă дивизион – 2-мĕш вырăн.
Вăрнарти стадионта реконструкци ĕçĕсем пынă пирки ют стадионсенче тренировкăсем ирттерме тивнĕ пулин те. Ача командисем килти вăйăсене Йĕпреç стадионĕнче, аслă командăсем Шупашкарти «Труд» стадионта йышăнчĕç. Анчах та сезон вĕçнелле «Звездопад» филиалĕн строителĕсем «Химик» стадионти футбол уйĕнчи строительство ĕçĕсене вĕçлерĕç. Чăваш футболĕн чылай представителĕ палăртнă тăрăх, вăл халĕ республикăра чи лайăххи.
«Химик-Августăн» ачасен команди 21 команда хушшинче малти вырăна тухни чăн-чăн триумф пулчĕ! Район центрĕнчи командăсене парăнтарчĕç, Шупашкар командисенчен выляса илчĕç. Пĕтĕмпе вĕсем 52 мечĕк тапса кĕртнĕ, хăйсен хапхине вара пĕр гол та кĕрттермен. Акă ăçта вăл чăн-чăн вăйă!
«Химик-Август-2» команда та иккĕмĕш лигăра çĕнтерме тĕллев лартнă. Ку задачăна вăл чаплă пурнăçларĕ. 2017 çулта вăл пĕрремĕш дивизионра выляма пуçлĕ.
Командăсен çитĕнĕвне Александр Борисович Строганов, Владимир Георгиевич Герасимов, Владимир Валерьевич Лаптев, Александр Николаевич Балыбердин тренерсен вăйĕпе опычĕ хывăннă.
Çак каç медальсемпе кубоксен ылтăнĕ çутатрĕ. Наградăсемпе тата асăнмалăх парнесемпе «Август» компанин генеральнăй директорĕ Александр Усков, финанс директорĕ Борис Тарасов, Вăрнарти завод директорĕ Владимир Свешников чысларĕç. Ашшĕ-амăшĕ ячĕпе Оксана Данилина тухса каларĕ, ачасене спортра аталанма пулăшнăшăн тав турĕ.
Чыслава Вăрнар ачисен пултарулăх номерĕсем черетлесе пычĕç. Уяв пуçламăшĕнче сцена çине «хаваслă мечĕксем» тухрĕç. Пĕчĕклех фитнес-аэробикăпа туслашнă ачасемпе киленни хăнасен сăн-питĕнче аван курăнчĕ. «Химик» спорт клубĕн «Некст» команди – фитнес-аэробика енĕпе Чăваш ен чемпионĕсен ташши вара пушшех тыткăнлать. Музыка парнипе хăнана Вăрнарти ача-пăча ÿнер шкулĕн вĕренекенĕсем çитрĕç. Çамрăк футболистсенчен илнĕ интервьюна пысăк экранпа кăтартни вара çав тери интереслĕ пулчĕ, вăл ашшĕ-амăшĕнче савăнăç куççулĕ кăларчĕ. Заводăн вокалпа инструментсен ансамблĕ илемлĕ композицисем парнелерĕ.
Уяв чаршавĕ хупăниччен куракансене Игорь Савинпа Юлия хĕрĕ дуэтпа юрлани тыткăнларĕ. Пĕрлехи сăнÿкерчĕк, конфетти салючĕ... Сезон хупăнчĕ, уяв вĕçленчĕ. Умра – тренировкăсем тата çĕнĕ çитĕнÿсем!
Людмила ИВАНОВА.