09 ноября 2016 г.
Октябрь вĕçĕнче «Август» Фирмăн «Вăрнарти хутăш препаратсен завочĕ» филиалĕнче Монголи Халăх Республикин тата Иркутск облаçĕн делегацийĕсем пулчĕç.
Сумлă хăнасен йышĕнче Монголири паллă бизнесмен, ял хуçалăх продукцийĕ туса кăларакан хăватлă «Гацуурт» компанин генеральнăй директорĕ Лахгва Чинбат та пулчĕ. Ку компани хăйĕн уйĕсенчи ÿсентăрана хÿтĕлеме «Август» препарачĕсемпе усă курать. Çавăн пекех вăл Фирмăн Монголири дилерĕ те.
Ку çĕршывра «Августăн» ÿсентăрансене хими мелĕпе хÿтĕлекен 20 препаратне регистрациленĕ. Продукципе тивĕçтересси ÿссех пырать.
Иркутск делегацийĕн йышĕнче ку регионти тата Забайкальери аграрин пысăк предприятисен ертÿçисем пулчĕç.
Хăнасене хăйсем «Август» компанирен туянакан хими хÿтĕлевĕн хатĕрĕсен производствипе, пахалăха еплерех тĕрĕсленипе паллаштарчĕç.
Производство цехĕсенче тата наукăпа производство центрĕнче пулнă хыççăн Чинбат господин çакна палăртрĕ: «Курни шутланинчен пачах урăхла. Завод ман шухăшринчен нумай хутчен пысăкрах. Компанин хăйĕн технологи. Препаратсене хупма савăтсен производствине аван йĕркеленĕ. Продукцин кашни партине тĕрĕслеççĕ, тĕслĕхсем илеççĕ. Çакă манра ÿсентăрансене хÿтĕлекен хатĕрсен пахалăхĕ тĕлĕшпе пысăк шанăç çуратрĕ. Манпа пĕрле экскурсире Монголири ÿсентăрансене хÿтĕлекен институтăн наука ĕçченĕсем пулни кăмăллă. Тепрехинче кунта хамăрăн çĕр ĕçченĕсене илсе килес килет, вĕсем те ку заводра пахалăхлă продукци кăларнине хăйсем курса ĕненччĕр».
Хăнасем Ĕç Мухтавĕн музейĕнче пулса тĕлĕнчĕç. «Август» сывлăхпа кану паркне те çитрĕç. Палăртмалла, 2015 – 2016 çулсенче компани ун строительствине 11 млн ытла тенкĕ хывнă.
Людмила ИВАНОВА.