03 ноября 2016 г.
Кăçалхи çула Карл Маркс ячĕллĕ хуçалăх ĕçченĕсем лайăх кăтартусемпе вĕçлесе пыраççĕ. Кунта пĕрчĕллĕ тата пăрçа йышши культурăсене 950 гектар çинче çитĕнтернĕ. Уйри пурлăха вăхăтра пухса илнĕ. Мĕншĕн тесен культурăсем лайăх хĕл каçнă, çуллахи ăшă çанталăк та ÿсме чăрмантарман.
Хĕрÿ тапхăрта уй-хиртен виçĕ комбайн татăлман. Çав вăхăтрах виçĕ трактор пĕр харăс акма çĕр хатĕрленĕ.
Çитес çул хуçалăхăн уй-хирне урапаллă çĕнĕ К-744 трактор тухĕ. Ăна вара нумаях пулмасть туяннă. Çакна палăртмалла, хуçалăхра техника паркне çĕнетессине пысăк тимлĕх уйăраççĕ. Унсăрăн ĕçе эффективлă йĕркелеме май çуккине лайăх ăнланаççĕ хуçалăха ертсе пыракансем. Техника пахалăхлă, палăртнă ĕçсене те вăхăтра тума май пур.
Хуçалăхра тырă кăна туса илмеççĕ, выльăх-чĕрлĕх те йышлă усраççĕ. Сĕте куллен патшалăха сутаççĕ.
Кăçал кивĕ ферма çуртне пăснă та ун вырăнне çĕннине çĕклесе лартнă. Иккĕмĕш фермăна та тума пуçланă. Строительство ĕçĕсем лайăх пырсан ăна çитес çул хута ярасшăн.
К.ЮРЬЕВ.