03 ноября 2016 г.
Раççей Федерацийĕн Конституцийĕпе килĕшÿллĕн уйрăм тĕслĕхсенче граждансен тÿлевсĕр юридици пулăшăвĕ илме право пурри çинчен çырнăччĕ. Анчах та нумайăшĕн право хÿтлĕхне еплерех тивĕçмелли пирки ыйтусем вĕçленмен-ха, çавна май çак ыйтăва тепĕр хут çĕклетпĕр.
Раççей юстици министерствин Чăваш енри управленийĕнчен пĕлтернĕ тăрăх, тÿлевсĕр юридици пулăшăвне патшалăх структурисенче те, патшалăхăн марринче те илме пулать.
Патшалăх секторне федераллă тата регионсенчи ĕç тăвакан влаç органĕсем, вĕсене пăхăнакан учрежденисем, патшалăхăн бюджет тулашĕнчи фондсем, çавăн пекех адвокатсемпе нотариуссем кĕреççĕ. Ун йĕркипе пулăшăва (уголовлă суд ĕçĕпе çыхăннă ыйтусемсĕр пуçне) тупăш сахал илекен граждансем, I тата II ушкăнри инвалидсем, вăрçă ветеранĕсем, Раççей Геройĕсем, Совет Союзĕн Геройĕсем, Социализмла Ĕç Геройĕсем, Раççей Федерацийĕн Ĕç Геройĕсем, инвалид ачасем, тăлăх тата ашшĕ-амăшĕн хÿттисĕр юлнă ачасем, ачана усрава илес текенсем тата илнисем, социаллă тивĕçтерĕвĕн стационарлă учрежденийĕсенче пурăнакансем, профилактика тытăмĕнчи учрежденисенчи çула çитмен çамрăксем, ăс-тăн пăсăлнипе аптăракансем, чрезвычайлă пулăма пула айăпланнисем тивĕç.
Çакăн пек тĕслĕх пулнă. Куç курманнипе II ушкăнри инвалида ĕçе илесшĕн пулман. Ку ыйту тÿлевсĕр юридици пулăшăвĕ памалли переченьсен шутне кĕрет. Кунашкал категорири çынсем хурава çыру мелĕпе е сăмах вĕççĕн илме пултараççĕ, çавăн пекех вĕсене право сĕмĕллĕ документ (çăхав, заявлени, тавăç тата ытти те) хатĕрлесе пама та тивĕç.
Çакăн валли авдокатсен списокне кĕртнĕ кирек хăш адвокат патне те кайма юрать. Республикăра вĕсем 70-ĕн. Сăмах май, тÿлевсĕр юридици пулăшăвĕ паракан адвокатсен списокĕ тата контакчĕсем Чăваш Республикин Адвокат палатин официаллă сайтĕнче йăлтах пур.
Хамăр хаçатра тÿлевсĕр юридици пулăшăвĕ пирки статья пичетленĕ хыççăн пĕччен ача çитĕнтерекен амăшĕнчен çыру килчĕ. Унăн унчченхи мăшăрĕ хăйĕн тупăшĕсене пытарать тата алимент тÿлемест иккен. Хăйĕн ачисене хÿтĕлес тĕлĕшпе тÿлевсĕр юридици пулăшăвĕ илме пултаратăп-и, тесе ыйтать хĕрарăм.
Раççей юстици министерствин Чăваш енри управленийĕнчен пĕлтернĕ тăрăх, федераллă саккунпа килĕшÿллĕн, пĕччен амăшĕ тÿлевсĕр юридици пулăшăвĕ илме тивĕç çынсен йышне, шел те, кĕмест. Анчах та ку пулăшăва нумай ачаллă çемьесене чăрмавсăрах параççĕ.
Енчен те ку категорине те кĕмесен тÿлевсĕр юридици пулăшăвне патшалăхăн мар тытăмĕн йĕркипе илме пулать. Ку тытăма хутшăнакансем (аслă шкулсем çумĕнчи юридици клиникисем тата тÿлевсĕр юридици пулăшăвĕ паракан патшалăхăн мар центрĕсем) право ыйтăвĕсен переченьне тата тÿлевсĕр пулăшу илме пултаракансен кагегорине хăйсем палăртаççĕ.
Пирĕн республикăра юридици клиникисем тăваттă: Шупашкарти кооператив институчĕ, Мускаври Патшалăх управленийĕн тата право институчĕн филиалĕ, Мускаври гуманитарипе экономика институчĕн филиалĕ тата И.Н.Ульянов ячĕллĕ Чăваш патшалăх университечĕ çумĕнче.
Патшалăхăн мар тÿлевсĕр юридици пулăшăвĕн центрĕсем виççĕ: «Раççей юрисчĕсен ассоциацийĕн» регионти уйрăмĕ, Чăваш Республикин юристсен союзĕ тата Виктор Ильинăн право тĕлĕшпе хÿтĕлекен центрĕ çумĕнче.
Тÿлевсĕр юридици пулăшăвĕ тĕлĕшпе консультацие Раççей юстици министерствин Чăваш енри управленийĕнче илме пулать. Адресĕ: Шупашкар, К.Маркс ур., 56-мĕш çурт. Тел.: 8(8352) 62-51-44, 62-34-89.
Светлана ЧИКМЯКОВА.