26 октября 2016 г.
Октябрь уйăхĕ юбилейсемпе пуян. Çак кунсенче Кайри Тукай ялĕнчи Анна Степановна Николаева 100 çул тултарчĕ. Ватăна сумлă юбилейпе район администрацийĕн пуçлăхĕ Леонид Николаев, Çĕрпел ял тăрăхĕн пуçлăхĕ Лидия Федорова ăшшăн саламларĕç, ырлăх-сывлăх сунчĕç. Юбиляра Раççей Федерацийĕн Президенчĕн В.Путинăн саламлă çырăвне вуласа пачĕç, парне тыттарчĕç.
Аслă ăрури нумай çын пекех Анна Степановнăна çăмăл шăпа тивĕçмен. Унăн пурнăçра тĕрлĕ йывăрлăха чăтса ирттерме тивнĕ, выçă ларнă кунсем те пĕрре мар пулнă. «1 мая» колхозра ырми-канми тăрăшнă, бригадăра та, фермăра та ĕçленĕ. Шкулта тăватă класс таран лайăх паллăсемпе кăна вĕренсе пынă. Анчах та малалла пĕлĕве тарăнлатайман, мĕншĕн тесен çăкăр çиессишĕн хуçалăх ĕçне кÿлĕннĕ.
Мăшăрĕпе Петр Николаевпа тăватă ачана тĕрĕс воспитани парса пăхса çитĕнтернĕ. Çывăх çынни Тăван çĕршывăн аслă вăрçине хутшăннă. Шел пулин те П.Николаев темиçе çул каялла çут тĕнчерен уйрăлса кайнă. Халĕ Анна Степановна Иван ывăлĕпе пурăнать.
Юрий КОРНИЛОВ.