22 октября 2016 г.
Юнкун иртнĕ Пĕрлехи информаци кунĕ йĕркипе районти вуникĕ ял поселенийĕнче тĕлпулусем йĕркеленĕ
Района Чăваш Республикин юстици министрĕн заместителĕ Алексей Вязов, Роспотребнадзорăн республикăри управленийĕн ертÿçи Надежда Луговская, пурăнмалли çурт-йĕр патшалăх инспекцийĕн ертÿçин заместителĕ Елена Миронова килсе çитрĕç. Информушкăнсене Чăваш ен Патшалăх Канашĕн экономика политики, агропромышленность комплексĕ тата экологи ĕçĕсен комитечĕн председателĕ Сергей Павлов ертсе пычĕ.
Сергей Владимирович район администрацийĕн пуçлăхĕпе Леонид Николаевпа тата районти асăрхав ĕçĕ-хĕлĕн пайĕн ертÿçипе Александр Шурдеевпа Çавалкас, Кĕçĕн Кипек тата Санарпуç ял тăрăхĕсенчи халăхпа тĕл пулчĕ.
Çавалкассем иртнĕ суйлавра пуринчен те хастартарах пулнă, списока кĕртнĕ пур сасăлавçă та тенĕ пек участоксене пынă. Ку тĕслĕхре вырăнти влаçпа халăх пĕр тĕллевлĕн, пĕр шухăшлăн ĕçлени курăнать, палăртрĕç хăнасем. Сергей Павлов та, Леонид Николаев та тĕлпулусенче район малашлăхĕшĕн, аталанăвĕшĕн пĕрлешсе ĕçлеме чĕнсе каларĕç, çакăн чухне кăна пысăк çитĕнÿсем тума пулать, терĕç.
Хальхи информаци кунĕнче хăрушсăрлăх теми тĕп вырăна тухрĕ. Иртнĕ çулхипе танлаштарсан, статистика лайăхланнă, анчах та ыйту пурпĕр çивĕч тăрать. Кăçалхи тăхăр уйăхра акă районти çулсем çинче 28 инкек пулнă. Вĕсенче виçĕ çын пурнăçĕ татăлнă, 45-ĕн аманнă. Çул-йĕр правилисене пăснă 2370 тĕслĕхе палăртнă. Вăл шутран руль умне ÿсĕрле ларнăшăн – 107, 4 млн ытла тенкĕлĕх штраф хунă.
Пушарсенче виçĕ çын вилнĕ, улттăн аманнă.
– Çул çинче те, йăлара та яланах тимлĕ пулмалла. Уйрăмах кĕркуннехи-хĕллехи тапхăрта электроприборсемпе, кăмакасемпе усă курнă чухне тимлĕхе ÿстермелле, – асăрхаттарчĕç информаци ушкăнĕн членĕсем.
Промышленноçри кăтартусене пĕтĕмлетнĕ май, район администрацийĕн пуçлăхĕ тăхăр уйăха вăрнарсем ÿсĕмпе вĕçленине палăртрĕ. Продукци туса кăларасси тата тиесе ярасси 28 тата 32 процент ÿснĕ. Лидерĕсем яланхиллех – Вăрнарти хутăш препаратсен завочĕ, Вăрнарти аш-какай комбиначĕ, «Чувашкабельмет».
Ял хуçалăхне илес пулсан, сĕт суса, аш-какай туса илесси ÿснĕ. Тырпула кăçал аван пухса кĕртнĕ. Анчах та уйра ĕç вĕçленмен-ха – виçĕ хуçалăхра халĕ те çĕрулми кăлараççĕ. Ку ыйтăва район ертÿлĕхĕ куçран вĕçертмест, кая юлнă хуçалăхсене пулăшма майсем шырасах тăрать.
Çавалкассем кăçалхи ял хуçалăх çулталăкне те аван вĕçленĕ. Тырă тухăçĕ чи пысăкки. Кăçал выльăх-чĕрлĕх çурчĕсене юсасси-çĕнетессипе нумай ĕç тунă. Хуçалăх ертÿçи Валерий Шумилов хăйĕн ĕçченĕсене тĕрлĕ енпе хавхалантарать, вăл шутра – районти «Çĕнтерÿ çулĕ» хаçата çырăнса парса та.
Кăна Валерий Филиппович ахальтен асăнмарĕ. Хаçат-журнал çырăнтарас ыйтăва хальхи информаци кунĕн темисен шутне кĕртнĕ. «Çĕнтерÿ çулĕ» хаçата илес пулсан, ăна 2017 çулхи пĕрремĕш çур çул валли хальлĕхе Хапăс, Ершепуç, Калинино, Кĕçĕн Кипек, Кушар Юнтапа, Çĕрпел, Енĕш, Уравăш почта çыхăнăвĕсен уйрăмĕсенче хастартарах çырăннă. Ыттисен те вĕсенчен юлас марччĕ – çитес çул та район хаçачĕпе пĕрле пуласчĕ.
Светлана ЧИКМЯКОВА.