22 октября 2016 г.
Пурнăç лайăх енне улшăнать. Халĕ ыйтусене килтен тухмасăрах, электронлă тивĕçтерÿсен пулăшăвĕпе татса пама пулать. Вĕсем çинчен вулакансене Раççей Пенси фончĕн Чăваш енри уйрăмĕн ертÿçи Роза КОНДРАТЬЕВА каласа кăтартать.
– Роза Алексеевна, Пенси фончĕн электронлă тивĕçтерĕвĕсемпе кам усă курма пултарать-ха?
– Халăхăн мĕнпур категорийĕ. Ачаллă çемьесем валли пирĕн амăшĕн капиталĕн электронлă сервисĕ пур. Инвалидсем уйăхсеренхи тÿлев валли килтен тухмасăрах заявлени çырма пултараççĕ. ,çлекен çынсем – стаж, пенси балĕсем, тÿленĕ страхлав хывăмĕсем çинчен пĕлме. Тивĕçлĕ канăва кайма хатĕрленекенсем пенсие палăртассине Интернет урлă йĕркелеме пултараççĕ. Пенсионерсем – пенсие мĕнле майпа çитерсе парассине суйлама. Унсăр пуçне, клиентсен Интернет урлă йышăнăва çырăнма, справкăсем, документсем ыйтса яма, çырупа тухма май пур.
– Хăш электронлă сервиспа ытларах усă кураççĕ-ха?
– Интернетри уйрăм пÿлĕм урлă амăшĕн капиталĕнчен паракан пĕр хутченхи тÿлев пирки заявленисем ытларах ыйтса çырнă. Пĕчĕк ачаллă амăшĕсемшĕн ку питĕ меллĕ – заявленин электронлă формине тултармалла, кайран йĕрлесе пымалла çеç. Аса илтерме, ку заявленисене ноябрĕн 30-мĕшĕччен çырмалла.
Çавăн пекех кăçалхи çулларан амăшĕн капиталĕн сертификачĕпе усă курасси пирки те Интернет урлă заявлени çырма пулать. Анчах та пилĕк кун хушшшинче документсене Пенси фондне харпăр хăйĕн çитермелле.
– Çамрăксем Интернетпа çăмăллăнах усă кураççĕ-ха, анчах аслă ăрурисемшĕн йывăрлăх тухса тăмасть-и?
– Пенсие тухма хатĕрленнисемшĕн – йывăр мар. Сентябрьте пенсие палăртма тата çитерсе пама заявленисен 60 процентне Интернет урлă çырнă. Компьютерпа ĕçлеме аслăрах ÿсĕмрисем те вĕренсе пыраççĕ. Халĕ вĕсем валли те компьютер курсĕсем пур. Ку тĕлĕшпе республика бюджечĕ те, Пенси фончĕ те укçа-тенкĕ сахал мар уйăрать.
– Гражданинăн уйрăм пÿлĕмне йĕркелесси пирки тепĕр хут аса илтерсемĕр.
– Малтанах патшалăх тивĕçтерĕвĕсен пĕрлехи порталĕнче регистрациленмелле, учет записьне Пенси фондĕнче, е нумай функциллĕ центрта, е ĕçлев службинче, е «Ростелекомра», е почтăра çирĕплетмелле. Илнĕ парольпе пĕрлехи портала та, уйрăм пÿлĕме те кĕме пулать.
Йывăрлăхсем сиксе тухсан пирĕн пата, Пенси фондне, килĕр. Специалистсем электронлă тивĕçтерÿсемпе усă курма çăмăллăнах вĕрентĕç.