19 октября 2016 г.
Эрнекун Вăрнарта «Единая Россия» партин районти уйрăмĕн конференцийĕнче сентябрьти Раççей Патшалăх Думин, Чăваш ен Патшалăх Канашĕн депутачĕсен суйлавĕсене тата вырăнти хăйтытăмлăх органĕсен депутачĕсен суйлавне пĕтĕмлетрĕç.
Иртнĕ суйлава списока кĕртнисен 72,6 проценчĕ хутшăннă. «Единая Россия» партишĕн 56,72 проценчĕ сассисене панă. Регионти ушкăнри 20 кандидатран саккăрăшĕ мандатсем илнĕ, вăл шутра – Алена Аршинова та. Пĕр мандатлă 38-мĕш Шупашкар суйлав округĕпе Патшалăх Думине ытларах сасă пухса Леонид Черкесов суйланнă. Вăрнарсенчен уншăн 52,6 проценчĕ хăйсен сассисене панă.
«Единая Россия» республика парламенчĕн суйлавĕнче те çĕнтернĕ. Ун кандидачĕсене вăрнарсен 55,52 проценчĕ шаннă. Пĕр мандатлă округпа Сергей Павловшăн 59,2 проценчĕ сасăланă.
– Пирĕншĕн районта суйлав уççăн, конкурентлă, саккунлă иртни хаклă. Оппозицисем темĕнле пăтраштарчĕç пулин те халăх тĕрĕс çул-йĕре мала хуни палăрчĕ. Суйлав саккунлăхне тĕнчери сăнавçăсем те палăртрĕç, – терĕ «Единая Россия» партин Вăрнар районĕнчи уйрăмĕн секретарĕ Леонид Николаев. – Умра – пысăк ĕçсем, пирĕн суйлав умĕнхи шантарусене пурнăçлассипе, партин «Чăваш ен – пурăнма хăтлă регион» программăна ĕçе кĕртессипе тимлесе ĕçлемелле.
Вырăнти хăйтытăмлăх органĕсен депутачĕсен хушма суйлавĕнче Малти Ишек суйлав округĕпе район Пухăвĕн депутатне Василий Ананьев суйланнă. Упнер, Мăн Явăш тата Çĕрпел ял тăрăхĕсен Пухăвĕсен депутачĕсен йышне Антонина Арбузова, Юрий Спиридонов тата Анатолий Иванов кĕнĕ.
Конференци вăхăтĕнче партин районти уйрăмĕн политканаш йышне те çĕнетрĕç. Вăрттăн сасăлавра Ольга Львова, Василий Ананьев тата Надежда Никишова ун çĕнĕ членĕсем пулса тăчĕç.
Иртнĕ суйлав кампанийĕн хастарĕсене те чысларĕç. «Единая Россия» партин районти уйрăмĕн Тав хучĕсене «Вурнарская» МСО хуралçи Рамиль Ахметов, Сергей Флегентов уйрăм предприниматель, Шĕнер Ишек ял тăрăхĕн пуçлăхĕ Радим Убаков, РЦДК учитель-дефектологĕ Оксана Октябрьская, Вăрманкасри культура çурчĕн ертÿçи Галина Ефимова тивĕçрĕç.
Светлана ЧИКМЯКОВА.