19 октября 2016 г.
Куç курманнисен республикăри обществи çак ятпа ирттернĕ конкурса Вăрнарти пуçламăш организаци членĕсем те хутшăннă.
Вăрнарсен «Пĕрле телейлĕ» командине организаци ертÿçи Галина Мясникова, Вăрнарти Лидия Терентьева, Галина Паймулкина, Пăртасри Надежда Константинова, Упнерти Галина Иванова пĕрлешнĕ. Конкурссем – визитка, общество ĕçне такмаксенче сăнласси, ăс-хакăл, ташă тупăшăвĕсем, пĕр сăмахран тĕрлĕ сăмахсем тупасси – тĕпрен илсен, инвалидсемпе мĕнле ĕçленине кăтартассипе çыхăннă.
Республикăра куç курманнисен пуçламăш организацийĕсем 12, конкурса вуннăшĕ хутшăннă. Вăрнарсем «Вырăнти чи креативлă организаци» номинацире палăрнă.
Куç курманнисен вырăнти организаци членĕсем диплома тивĕçнипе пĕрлех хăйсене çула тухма районти социаллă тивĕçтерÿ центрĕ транспортпа пулăшнăшăн тата ун ертÿçи Людмила Николаева конкурса пĕрле пынăшăн чĕререн савăннă.