15 октября 2016 г.
Виçĕмкун республикăри нумай шкулта налук пĕлĕвĕн кунĕ иртнĕ
Кунашкал уроксене Чăваш енре 2002 çултанпах ирттереççĕ. Учительсем вырăнĕнче – налук инспекцийĕн ĕçченĕсем. Ачасене вĕсем ку тытăм аталанăвĕн историйĕпе паллаштараççĕ, кĕçĕннисенче налук политикин ырă хутшăнăвĕсене йĕркелес тесе тăрăшаççĕ.
Раççей федераллă налук службин Чăваш енри 3-мĕш налук инспекцийĕн пуçлăхĕ Юрий Егоров пĕрлехи налук пĕлĕвĕн кунĕнче Вăрнарти 2-мĕш вăтам шкулта пулнă. Маларах кун пек уроксем Йĕпреçри 1-мĕшпе 2-мĕш шкулсенче те иртнĕ.
Урок «Налук службин аталану историйĕ» фильмран тытăннă. Малалла Юрий Владимирович налуксем, унăн пĕлтерĕшĕ тата налук саккунĕсене пăхăннин кирлĕлĕхĕ, ку тытăмăн историйĕ, налук тĕсĕсем çинчен каласа кăтартнă.
Ачасене уйрăмах тĕлĕнмелле налуксем кăсăклантарнă. Юрий Владимирович хăй вăхăтĕнче шĕлепкесем, сухал, ĕмĕлке, хĕвел, тăвар тата ытти çине те налуксем хунине каланă. Ун калаçăвне слайдсем, ачасен ыйтăвĕсем пуянлатнă.
Налук инспекцийĕн пай пуçлăхĕ Лариса Кудрявцева электронлă сервиспа еплерех усă курмаллине кăтартнă, федераллă налук службин официаллă сайтĕнче уйрăм çынсен, уйрăм предпринимательсен, юридици сăпатĕнчисен уйрăм пÿлĕмĕсем пуррине ăнлантарнă. Ачасем пĕр тĕсĕпе – ДЕМО-версипе – кăмăлласа паллашнă. Вĕренекенсем ИНН илме хăйсемех заявленисем çырма пултарнă.