12 октября 2016 г.
Сентябрĕн 22-мĕшĕнчен тытăнса октябрĕн 22-мĕшĕччен пĕтĕм республикăри пекех пирĕн районта та «Полици тата ачасем» акцин иккĕмĕш тапхăрĕ пырать. Унăн тĕллевĕ пархатарлă – çула çитменнисене преступлени çулĕ çине тăрассинчен асăрхаттарасси, вĕсем тĕрлĕ инкексене, мушенниксен аллине лекессинчен хÿтĕлесси.
Çакна шута илсех полици, çул-йĕр хуралĕн, сывлăх сыхлавĕн, вĕрентÿ пайĕн, социаллă хÿтлĕх тата ĕçлев центрĕсен ĕçченĕсем хутшăннипе районти вĕрентÿ организацийĕсенче пуринче те тенĕ пек тĕлпулусем иртнĕ, ачасене, ашшĕ-амăшĕсене, вĕрентекенсене кирлĕ сĕнÿсем панă. Ыран кунашкал профилактика ĕçĕн ушкăнĕ Хăмăшри, Ярмушкари тата Аçăмçырминчи шкулсене çитмелле.
Статистикăна илес пулсан, кăçалхи сакăр уйăхра районта çула çитменнисем хутшăннипе 13 преступлени çырăннă, пĕлтĕр улттă пулнă. Вĕсем уйрăмах укçа, кĕсье телефонĕсене е ют япалана вăрланипе çыхăннă. Кăçал акă телефонсем çухалнă тĕслĕхсем Çĕрпел шкулĕнче иккĕ, ача-пăча ÿнер шкулĕнче çырăннă. Çавăнпа та тĕлпулусенче кунашкал фактсене асăрхаттарасси пирки çивĕччĕн калаçнă.
Кĕçĕннисем çул-йĕр инкекĕсене лекнинче аслисен айăпĕ пĕчĕк мар – вĕсене правилăсене кирлĕ пек ăнлантарман. Кăçал ак Чăрăшкас Хирлепре 6 çулхи ача уйăрман вырăнтан чупса каçма тăнă та автомобиль урапи айне пулнă. Уравăшра çула çитмен арçын ача велосипедпа пыракан виçĕ çулхи ача çине кĕрсе кайнă.
Ку тата ытти инкексене асăрхаттарма йывăр мар – нихăçан та тимлĕхе çухатмалла мар.
– Нумай чухне ачасем çемьесенче те йывăр лару-тăрăва лекеççĕ. Ашшĕ-амăшĕ, тăванĕсем е опекунсем хĕн кăтартнă тĕслĕхсем час-часах пулкалаççĕ. Кун пирки те шкулсенчи тĕлпулусенче тăтăшах калаçатпăр. Анчах та ачасем аслисенчен хăраса чунĕсене уçмасан та пултараççĕ. Кун пек чухне çула çитменнисем психологсемпе юристсенчен пулăшу е канаш илме пултараççĕ. Шанăç телефонĕсене аса илтерни вырăнлă: Пĕтĕм Раççейри пĕрлехи шанăç телефонĕ – 8-800-2000-122, республикăри шанăç телефонĕ – 8-800-100-49-94, Раççей Следстви комитечĕн Чăваш Республикинчи следстви управленийĕн шанăç телефонĕ – 8–8352-624-658, кĕсье телефонĕнчен – 123, – пĕлтерет полицин «Вурнарский» пайĕн çула çитменнисемпе тимлекен инспекторĕ Диана Иванова.
Уйăхлăх вăхăтĕнче çула çитменнисене уголовлă тата административлă законодательство никĕсĕсемпе паллаштарĕç, саккунсене пăхăнса пурăнмаллине вĕрентĕç. Çавăн пекех экстремистла идеологие саракансен витĕмĕнчен те хÿтĕлеме май килĕ.
Светлана ЧИКМЯКОВА.