08 октября 2016 г.
Районта ял хуçалăх ĕçĕсем малалла пыраççĕ. Район администрацийĕн ял хуçалăхĕпе экологи пайĕнчен пĕлтернĕ тăрăх, ĕнерхи кун тĕлне çĕрулмие 411 гектар (67 процент) кăларнă. Вăтам тухăç – 195 центнер. Районта «иккĕмĕш çăкăра» 7 ял хуçалăх предприятийĕпе 6 фермер хуçалăхĕнче лартса çитĕнтернĕ. Чи пысăк лаптăк – «Мураты» хуçалăхăн.
«Мураты» – районта малта тата аталанса пыракан хуçалăхсенчен пĕри. Кăçал кунта «иккĕмĕш çăкăра» 120 гектар çинче лартса çитĕнтернĕ. Çавăн пекех çĕрулмие тата пахчаçимĕçе упрамалли вырăнта сивĕтмелли çĕнĕ оборудовани вырнаçтарнă.
Çак кунсенче «Мураты» хуçалăхра «иккĕмĕш çăкăра» кăларса пĕтернĕ. Тухăç япăх мар, кашни гектартан 210 центнер тухнă. Çакна палăртмалла, çу кунĕсенче çĕрулми анине час-часах шăварнă.
Район администрацийĕн пуçлăхĕн пĕрремĕш çумĕ – ял хуçалăхĕпе экологи пайĕн пуçлăхĕ В.Горбунов тата унăн çумĕ В.Шашкин виçĕ хуçалăха çитсе килнĕ. Малтан «Санары» хуçалăхра пулнă. Кунта «иккĕмĕш çăкăра» 80 гектар çинче лартса çитĕнтернĕ. Хуçалăх элита çĕрулми вăрлăхĕ туса илет. Кашни гектартан 298 центнер тухать.
«Янгорчино» хуçалăхра икĕ «Grimme» комбайн ĕçлеççĕ.
«Знамя» хуçалăхра та ĕç кал-кал пырать. Уйра çĕрулми кăлармалли пĕр комбайн ĕçлет. «Мураты» предприятирен техника килессе кĕтеççĕ. Хуçалăх ертÿçи В.Васильев уйра мĕн çитĕнтернине пысăк тăкаксăр пухса кĕртессе шанать.
Юрий КОРНИЛОВ.