08 октября 2016 г.
Калинино райповĕнче ватăсен кунне чаплăн уявларĕç. Палăртнă вăхăт тĕлне «Çавал» кафене тĕрлĕ ялсенче магазинсенче ĕçлесе тивĕçлĕ канăва тухнă хĕрĕхе яхăн сутуçă-ветеран пуçтарăнчĕ.
Вĕсем хушшинче вăтăр çул ытла аслă бухгалтер пулса тимленĕ Маргарита Сергеева та пулчĕ. Ватăлнă сăнлă мар вăл, халĕ те йăрăс кĕлеткеллĕ, илемлĕ сăн-питлĕ.
Çар водителĕ пулнă, пиншер çухрăм чупса ялсене тавар турттарнă Кÿлхĕрринчи Валерий Яковлев. «Çавал» кафере поварта тимленĕ Мачамăшри Лидия Павлова. Шăхальти ĕç ветеранĕ, юрăç Иван Смирнов. Уява килнисене пурне те мухтама пулать – тĕлĕнмелле ветерансем.
Çывăхри, инçетри ялсенчен килнĕ хăнасене потребительсен обществин Канашĕн председателĕ, Чăваш Республикин суту-илÿ ыйтăвĕсене тивĕçтерес ĕçĕн тава тивĕçлĕ ĕçченĕ Венера Эриковна Николаева тата унăн пулăшуçисем кĕтсе илчĕç.
Чаплă уява В.Николаева уçрĕ, ветерансене сывлăх, телей сунчĕ, кĕскен кулленхи ĕçсемпе паллаштарчĕ.
Ветерансен умне Калинино шкулĕнче пуçламăш класра вĕренекенсем тухрĕç. Вĕсем çур сехете яхăн ватăсене сăвăсемпе саламларĕç. Вăрнарти культура çуртĕнчен килнĕ купăсçăпа юрăçă кунта пуçтарăннисене çавăн пекех уяв ячĕпе саламларĕç.
Пурнăçран вăхăтсăр уйрăлнисене, пĕрле ĕçленĕ сутуçăсене те манмарĕç, ятран асăнчĕç, вĕсем хушшинче райпона тивĕçлĕ ертсе пынă пуçлăхсем – Константин Кадыковпа Лидия Миговарова.
Акă Шăхальтен килнĕ Иван Смирнов «Шăнкăр-шăнкăр шыв юхать» юрра Вăрнарти купăсçăпа пĕрле юрласа ячĕ те пĕтĕм зал ура çине тăчĕ. Чĕрене пырса тивекен сăмахсем нумайăшне хумхантарчĕç пулмалла – куçĕсем шывланчĕç. Иван Смирнов ветерансене телей, сывлăх сунчĕ. «Ан кай, кăвакал, шыв хĕрне» юрра пуçларĕ.
Сывлăхлă пулăр, ветерансем.
Райпо пуçлăхĕн заместителĕ пулса ĕçленĕ
Иван ЕГОРОВ.
Шĕнер Ишек.