01 октября 2016 г.
20 çул ытла каялла колхозсемпе совхозсен членĕсене çĕр пайĕсем уйăрнă. Чăваш Республикинче ял хуçалăх пĕлтерĕшлĕ 550 пине яхăн гектар граждансен пай харпăрлăхне куçнă. Анчах та çынсем вĕсемпе усă курма васкаманран саккун çак пая вырăнти администрацисене «парнелерĕ».
Росреестрăн Чăваш енри управленийĕ çĕр пайĕсене регистрацилемен тата унпа кирлĕ пек усă курман пулсан, суд ăна муниципаллă пĕрлĕхе пама пултарать.
Пушă çĕрсен шутне вилнĕ чылай граждансен пайĕсем кĕнĕ. Нумай чухне еткерçĕсем ашшĕ-амăшĕн çĕр пайĕсем тĕлĕшпе еткерлĕх правине илме васкамаççĕ. Кайран шутласа илеççĕ-ха – анчах кая юлаççĕ. Марина Петровапа та çавăн пекех килсе тухнă.
Еткерпе куçнă ашшĕн пайĕшĕн вăл 1993 çултанпа, амăшĕн пайĕшĕн 2002 çултанпа нимĕнле хут та çырман. Район сучĕн йышăнăвĕпе вĕсем муниципаллă харпăрлăха куçнă. Çак йышăнупа килĕшмесĕр М.Петрова апелляци тăратнă. Анчах та Чăваш Республикин Аслă сучĕ район сучĕн йышăнăвне саккунлах тесе хăварнă, пурăннă чухне М.Петрован ашшĕ-амăшĕ çĕрпе усă курман, вĕсем вилнĕ хыççăн М.Петрова тата ытти еткерçĕсем çĕр пайĕсене харпăрлăха куçарассипе нимĕнле утăм та туманнине палăртнă.
Петрова хăйне çакăн пирки нимĕн те пĕлтермен тесе хирĕçленĕ, анчах та суд палăртнă тăрăх, «Ял хуçалăх пĕлтерĕшлĕ çĕрсен çаврăнăшĕ çинчен» федераллă саккунпа килĕшÿллĕн вырăнти хăй тытăмлăх органĕсен кунашкал çĕр пайĕсене никам та усă курман çĕрсен шутне кĕртни пирки еткерçĕсене пĕлтермелле тесе çырман. Хушамачĕсемпе ячĕсене хаçатра тата сайтра пичетлеççĕ, асăрхаттарусене 3 уйăх йышăнаççĕ. Марина Петрова вара вăхăтра нимĕн те туман.
Росреестр управленийĕнчен пĕлтернĕ тăрăх, Чăваш енре усă курман 54 пин ытла çĕр пайĕсене йĕркене кĕртнĕ. Вырăнти хăйтытăмлăх органĕсем ку енĕпе малалла та ĕçлеççĕ. Çĕр пайĕсемсĕр юлас мар тесен харпăрлăх правине Росреестрта вăхăтра регистрацилемелле.
Светлана ЧИКМЯКОВА.