28 сентября 2016 г.
Иртнĕ эрне вĕçĕнче район кĕрешÿçисем Атăл тăрăхĕнчи округра мала тухассишĕн тупăшнă.
Ульяновск хулинче иртнĕ тупăшăва çиччĕн хутшăннă: Настя Максимова, Милена Федорова, Дима Львов (1-мĕш шкул), Елена Ластухина, Никита Львов (2-мĕш шкул), Александра Волкова (Санарпуç) тата Катя Кошкина (Мăн Явăш).
Спортсменсем призлă вырăна лекессишĕн вăйлă кĕрешнĕ. Анчах та пьедестал çине Катя Кошкина кăна хăпарма тивĕçнĕ. Кăтартăвĕ чаплă – вăл хăйĕн виçе категорийĕнче пурне те парăнтарнă, лайăх техникăпа палăрнă.
Катя – Чăваш Республикин тава тивĕçлĕ тренерĕн Виталий Трофимовăн вĕренекенĕ.
Катя спортăн ку тĕсĕпе 2-мĕш класра ăнсăртран тенĕ пек туслашнă. Шкулта ун чухне пушă вăхăтра ку енĕпе кăна аталанма май пулнă, пĕтĕм ача тенĕ пек уроксем хыççăн Алексей Анатольевич Степанов тренер патне ирĕклĕ кĕрешÿ секцине çÿренĕ.
Катьăн ашшĕ те, Валерий Николаевич, ку енĕпе ачасене ăсталăха хăнăхтарнă. Хĕрĕ кĕрешÿ техникине аван пурнăçланине курсан ăна ытларах тимлĕх уйăрнă.
4-мĕш класран ача-пăча спорт шкулне Виталий Трофимов патне çÿреме тытăннă. Туптанă ăсталăхĕ кĕске вăхăтрах тĕрлĕ турнирсенче çирĕпленнĕ. Ăнтăлăвĕ те пур. Халĕ вăл Вăрнара тата Санарпуçне кашни кун тенĕ пек тренировкăсене çÿрет.
Катя – Чăваш Республикин пилĕк хутчен чемпионĕ. Нумай хутчен – призер. Медалĕсем 40 енне.
Атăл тăрăхĕнчи ăмăрту – сумлисенчен пĕрремĕш. Ăна ăнăçлă пурнăçлани (тăватă тытăçура пурне те çĕнтернĕ) тата пысăкрах турнирсенче çитĕнÿ тума хавхалантарать. Ăна Атăл тăрăхĕн округĕн пĕрлештернĕ команди йышне илнĕ. Октябрьте Катя округ чысне Смоленскра пулакан Раççей первенствинче хÿтĕлĕ.
Светлана ЧИКМЯКОВА.