28 сентября 2016 г.
Пушар çынсемшĕн еплерех хăрушлăх кăларса тăратнине эпир пурте лайăх ăнланатпăр. Ăнсăртран сиксе тухса вăл хуралтăсене, пурлăха сиен кÿрет, унтан та хăрушăраххи вара – çын пурнăçне, уйрăмах ачасенне татни.
Пушар чылай чухне ачасен айăпĕпе сиксе тухнипе те пулать. Çакнашкал инкекрен хăтарас тесен ачасене тимлĕрех, асăрхануллăрах пулма, ку лару-тăрура хăйсене еплерех тытмаллине вĕрентмелле.
Калининăри «Çутă кайăк» ача садĕнче ĕçлекенсем «Пушартан сыхлан» уйăхлăх ирттерчĕç. Уйрăмах аслă тата шкула кайма хатĕрлекен ушкăнсен воспитателĕсем нумай ĕç пурнăçларĕç.
Вĕсем тăрăшнипе «Çулăм – юлташ, çулăм – тăшман», «Шăрпăк ан тыт – унта çулăм», «Пушар тухсан хăвна еплерех тытмалла», «Пушарнăйсен ĕçĕ мана мĕншĕн килĕшет» тата ытти нумай калаçу ирттерчĕç. Тĕрлĕрен вăйăсем хатĕрлерĕç. Уйрăмах ачасене «Çамрăк пушарнăйсем», «Хăрушă япаласем», «Пушар сÿнтерме мĕн кирлĕ» вăйăсем килĕшрĕç.
Воспитательсемпе ачасем хутшăннипе «Кошкин дом» спектакль кăтартрĕç.
Воспитательсем ачасемпе С.Шабровăн «Девочка со спичками», С.Я.Маршакăн «Кошкин дом», «Рассказ о неизвестном герое», Б.Житковăн «Пожар» хайлавĕсене вуласа сÿтсе яврĕç. С.И.Павлова воспитатель педагогсем валли «Азбука пожарной безопасности» консультаци ирттерчĕ. Çак уйăхлăхра Т.А.Фирсова, А.Г.Васильева, С.И.Павлова, Н.Ю.Медведева, Н.Л.Геннадьева аслă воспитатель нумай вăй хучĕç. Вĕсем тăрăшса ĕçлени сая каймастех тесе шутлатпăр.
Ирина МАТВЕЕВА.