28 сентября 2016 г.
Вăрнарти ял хуçалăх техникумĕн преподавательне Галина Павлована нумайăшĕ çăмăл атлетикăри, йĕлтĕр спортĕнчи, полиатлонри çитĕнÿсемпе аван пĕлет. Анчах вăл кире пуканĕн спортĕнче те ăста.
Шăматкун Комсомольски салинче Чăваш ен Патшалăх Канашĕн председателĕн Юрий Поповăн парнисемшĕн иртнĕ уçă турнирта вăл бронза медале çĕнсе илме пултарнă. 63 килограмлă виçе категорийĕнче Галина Павлова 16 килограмлă кире пуканне палăртнă вăхăтра туртăнтарса 67 хутчен çĕкленĕ. Каламалла, Галина Павлова ушкăнĕнчи спортсменсен ку тĕсре опыт пысăк, мала тухнисенчен пĕри – спорт мастерĕн кандидачĕ, тепри – пĕрремĕш разрядлă спортсмен.
Шĕнер Ишекри Олег Леонтьевăн та çак турнира хутшăнмалла пулнă. Анчах та Раççей Кубокĕ пĕр вăхăтра килнĕрен каччă унта тухса кайнă. Палăртма кăмăллă – унăн Алуштăри результатне Комсомольскинчи турнирăн зачетне илĕç.
Асăннă турнира хамăр республикăри çеç мар, кÿршĕллĕ регионсенчен, Мускав облаçĕнчен те спортсменсем килсе çитнĕ. Помост çине 300 ытла спортсмен тухнă.
Унта вăрнарсенчен Вăрманкасри Эльвира Чугунова тата Кульцаври Мария Першуткина та хутшăннă, анчах вĕсем призлă вырăна лекеймен.
Светлана ЧИКМЯКОВА.