28 сентября 2016 г.
Эрнекун Елчĕк районĕнчи Лащ Таяпара çăмăл атлетика енĕпе республика чемпионачĕпе первенстви иртнĕ. Вăрнар спортсменĕсем унта япăх мар ăмăртнă.
Хăмăшри Кристина Иванова, халĕ Олимп резервисен училищинче вĕренекенскер, хăй ÿсĕмĕнче иккĕмĕш вырăн йышăннă.
Юниорсем хушшинче Ершепуçĕнчи Диана Политова – чемпионка. Çавăн пекех вăл спорт мастерĕн кандидачĕн нормативне пурнăçланă.
Диана халĕ Шупашкарти Олимп резервисен училищинче вĕренет. Вăл – сумлă нумай ăмăртусен çĕнтерÿçи тата призерĕ.
Аçăмçырминчи Татьяна Ефимова, Раççей спорт мастерĕ, виçĕ пин метрлă дистанцие иккĕмĕш результатпа вĕçленĕ.
Ветерансем хушшинче Ярмушкари Михаил Илларионов бронза медале тивĕçнĕ.
Калинино шкулĕнче вĕренекенсем Евгений Крылов, Максим Максимов, Хапăсри Владимир Скворцов япăх мар чупнă – чи вăйлă вунă спортсмен йышне лекнĕ.
Район администрацийĕн социаллă аталану пайĕн пуçлăхĕн заместителĕ Сергей Политов каланă тăрăх, результатсем тата лайăхрах пулма пултарнă. Чирленĕ пирки тăватă вăйлă спортсмен старта тухайман.