28 сентября 2016 г.
Вырсарникун Вăрнар районĕ те Пĕтĕм Раççейри акцие – «Нацисен кросĕ» чупу кунне – хастар хутшăнчĕ. Старта тĕрлĕ ÿсĕмри 1200 ытла çын тухрĕ.
Район администрацийĕн пуçлăхĕ Леонид Николаев сывă пурнăç йĕркин тусĕсене саламларĕ çеç мар, яланхиллех чупуçăсен ретне тăчĕ, хăйĕн заместителĕсемпе, ял поселенийĕсен, предприяти-организацисен пуçлăхĕсемпе пĕрле дистанцие çăмăллăн тухрĕ.
Район администрацийĕн, тĕп больницăн, ветсанци ĕçченĕсем те чупăва массăллăн хутшăнчĕç.
Шкул ачисене – уйрăм чыс. Вĕсем кашни çулхи кросра – чи йышлисем. Кăçал вĕренекенсенчен харпăр хăй ÿсĕмĕнче Иван Шашков (Çĕрпел), Кира Ченчукова, Кристина Маркова (Вăрманкас), Стас Степанов, Юрий Петров (Аçăмçырми), Настя Тикинева (Хапăс), Евгений Крылов, Екатерина Судова (Калинино), Кристина Иванова (Хăмăш), Иван Иванов (Кĕçĕн Кипек) мала тухрĕç.
Ытти тапхăрсенчи çĕнтерÿçĕсем: Евгений Алексеев (район администрацийĕ), Борис Семенов (Кĕçĕн Кипек ял тăрăхĕ), Надежда Алексеева (Хапăс), Александр Михайлов (Çавалкас), Галина Павлова (ял хуçалăх техникумĕ), Сергей Степанов (Аçăмçырми), Александр Политов (Ершепуç), Эльвира Чугунова (Вăрманкас).
Пĕлтĕрхи пекех «Нацисен кросне» хутшăнакан кашни çын пылак парнеллĕ – пыллă – пулнă. Спонсорĕ – Иван Федоров утарçă.
Çĕнтерÿçĕсем вара медальсемпе грамотăсене, кубоксене тивĕçрĕç.