24 сентября 2016 г.
Пăрачкавпа Улатăр районĕсенче Африка мурне пула йĕркеленĕ карантин вăхăчĕ пĕтнĕ. Чăваш ен Пуçлăхĕ Михаил Игнатьев çакăн çинчен калакан документа иртнĕ эрне вĕçĕнче алă пуснă.
Йышăнупа килĕшÿллĕн хăрушлăх кăларса тăратакан иккĕмĕш зонăри районсен шучĕ те чакнă. Халĕ унта Улатăр, Патăрьел, Вăрнар, Йĕпреç, Комсомольски, Пăрачкав, Çĕмĕрле, Шăмăршă тăрăхĕсем, Улатăрпа Çĕмĕрле хулисем кĕреççĕ.
Карантин тапхăрĕ вĕçленни сыхлăха çухатассине пĕлтермест. Ветеринарипе санитари правилисем çапла тума май памаççĕ. Чир алхаснă вырăнта, хăрушлăх кăларса тăратакан пĕрремĕш тата иккĕмĕш зонăсенче карантин хыççăн ултă уйăх хушши сыснана, ун ашĕнчен хатĕрленĕ çимĕçе иккĕмĕш зонăран аякка илсе тухма юрамасть (ирĕк илнĕ хуçалăхсемсĕр пуçне).
Пĕрремĕшпе иккĕмĕш зонăсенче çак тапхăрта сысна сутма та (ирĕк илнĕ хуçалăхсене шута илмесен), ăна халăхран туянма та чару упранса юлать.
Малтанах чир алхаснă вырăнта тата пĕрремĕш зонăра хуçалăхсем карантин хыççăн çулталăк иртсен кăна витесене сысна илсе кĕме пултараççĕ. Унччен вĕсенче ытти йышши выльăх (çав шутра чăх-чĕп те) усрама юрать.