14 сентября 2016 г.
«Единая Россия» суйлав умĕнхи программăна сĕннĕ
«Чăваш ен – хăтлă пурăнмалли регион» пĕтĕмĕшле ятлă документ, чăннипе, республикăн çывăх пилĕк çул валли йышăннă социаллă-экономика аталанăвĕн планĕ шутланать. Программăна общественноçпа, халăхпа йĕркеленĕ тĕлпулусен пĕтĕмлетĕвĕсем тăрăх хатĕрленĕ.
– «Единая Россия» команди хуласемпе районсене тухса, предприятисенче, урамсенче куçа-куçăн калаçса 15 пин ытла тĕлпулу ирттерчĕ. Республикăра пурăнакансен сĕнĕвĕсем, ыйтăвĕсем парти программине хывăннă та, – пĕлтерет партин регионти уйрăмĕн секретарĕ Николай Малов.
Программăн тĕп çул-йĕрĕсенчен пĕри – çул-йĕр сетьне модернизацилесси, медицинăна аталантарасси, çĕнĕ ĕç вырăнĕсем йĕркелесси. Çак темăсем пирки çынсем час-часах калаçаççĕ те. Эппин, ыйтăвĕсем чăннипех çивĕч. «Единая Россия» вĕсем çине тĕрев тума палăртать те.
Единороссем мĕнле те пулин палăртнă датăна кĕтмеççĕ. Ĕçĕ кашни кунах курăнать. «Единая Россия» мăнаçлăхĕ – вĕрентÿ сфери. Çĕршывĕпе ача сачĕсен строительствин проекчĕ вĕçленме ĕлкĕреймерĕ, çĕршывра чи малтан тепĕр проекта – шкулсем çĕклессине тата модернизацилессине – пурнăçа кĕртме тытăнчĕç. Çывăх çулсенче Чăваш енре 32 çĕнĕ шкул пулмалла.
Медицинăра та çакнашкалрах тĕслĕх. «Единая Россия» Шупашкарта тата районсенче тата тепĕр 100 ФАП çĕклеме тĕллев лартать. Медицина тивĕçтерĕвне республикăн кашни çынни вăхăтра илме пултартăр.
– Пирĕн программăра тĕп вырăнта – çын, ун интересĕсене, ыйтăвĕсене тимлĕх уйăрасси, пурнăç вĕсемшĕн чăннипех та хăтлă пултăр. Çыншăнах экономика аталанать, социаллă сфера çĕнелет. Программăра чăн кăтартусем, чăн датăсем вырăн тупнă, кашни цифрăна тултарассишĕн эпир яваплă, – пĕлтерет Шупашкар хула пуçлăхĕ, муниципаллă пĕрлĕхсен Канашĕн правленийĕн председателĕ Леонид Черкесов.
Документ пĕтĕмлетÿллĕ мар. Николай Малов сăмахĕсемпе, программа граждансен шухăшĕпе республика бюджечĕн майĕсене кура çĕнелсех тăрĕ.