10 сентября 2016 г.
Наци библиотекинче чăваш çыравçин Улькка Эльменĕн пултарулăх каçĕ иртрĕ. Вăл Чăваш кĕнеке издательствин чи активлă авторĕсенчен пĕри. Унăн «Ма инçе-ши çăлтăрăм;», «Кая юлнă ÿкĕнÿ», «Çирĕп чунлисем телейлĕ», «Упраймарăм сана» кĕнекисем тĕрлĕ çулсенче кун çути курнă. Çыравçăн хайлавĕсем темиçе хут «Çулталăкри чи нумай вуланакан кĕнеке» конкурсăн çĕнтерÿçи пулса тăнă. 2016 çулта вăл вулакансем патне «Сарă кĕпе» çĕнĕ кĕнеке çитерчĕ. Унта повеçпе калав кĕнĕ.
Уяв каçĕнче юбиляра чи малтанах ЧР культура министрĕн пай пуçлăхĕ И.Ильина саламларĕ. Инна Ильинична Улькка Эльменĕн пултарулăхне пысăк хак пачĕ, ведомствăн Хисеп грамотипе чысларĕ. ЧР Профессионаллă писательсен союзĕн председателĕ Геннадий Максимов Ольга Геннадьевнăна асăннă союзăн Хисеп хучĕпе наградăларĕ.
Сăмах илекенсем татах та пулчĕç. Чăваш халăх поэчĕсем Ю.Сементер, А.Кибеч, В.Туркай, Н.Григорьев, Н.Пăрчăкан, С.Асамат тата ыттисем пултарулăх ĕçĕнче ăнăçу, çĕнĕ произведенисем çырма ырлăх-сывлăх сунчĕç.
Ольга ФЕДОРОВА,
Чăваш кĕнеке издательствин ертсе пыракан редакторĕ.