07 сентября 2016 г.
Августăн 15-мĕшĕнче Пĕтĕм Раççейри ял хуçалăх çыравĕ вĕçленчĕ. Халĕ малтанхи пĕтĕмлетÿсене тума май пур.
Вăрнар районĕнче çĕршыв пĕлтерĕшлĕ анлă мероприятие ирттерме ултă пÿлĕм уйăрнă, вĕсене оборудованипе, çыхăнупа, хуралпа, транспортпа тивĕçтернĕ. Ултă инструктор, 33 переписчик ĕçленĕ. Вăл шутран вунçичĕ переписчика планшетсемпе тивĕçтернĕ, ыттисем çырав даннăйĕсене машина вулакан хутсем çине тултарнă.
Çырав вăхăтĕнчи кадрсем, тĕпрен илсен, районти организаци-предприятисенче вăй хуракансем – 51,3 проценчĕ.
Пĕтĕм Раççейри ял хуçалăх çыравĕ вăхăтĕнче 14 ял хуçалăх предприятийĕн, 8 микропредприятин, 84 хресчен-фермер хуçалăхĕн, уйрăм çынсен 15054 хуçалăхĕн, уйрăм предпринимательсен ултă хуçалăхĕн, сад-пахча пĕрлешĕвĕсен 15 хуçалăхĕн объекчĕсене çырса тухнă.
Федераллă патшалăх статистика службин Чăваш Республикинчи территори органĕн Вăрнар районĕнчи пайĕн тĕп специалист-эксперчĕ Людмила Осипова пĕлтернĕ тăрăх, халăх çырава ăнланса хутшăннă, даннăйсене туллин пĕлтернĕ.
Хальхи вăхăтра ял хуçалăх çыравĕн хучĕсене тĕрĕслессипе тата ăна Чăвашстата ярса пама комплектлассипе тимлеççĕ.
Пĕтĕм Раççейри ял хуçалăх çыравĕн малтанхи итогĕсене 2017 çулхи тăваттăмĕш кварталта пĕлтерĕç, тулли пĕтĕмлетĕве – 2018 çулхи тăваттăмĕш кварталта.
Светлана ЧИКМЯКОВА.