23 июля 2016 г.
Çĕрпелте, патшалăхăн Вăрнарти сорт участокĕнче, районти агрономсен семинар-канашлăвĕ вырма ыйтăвĕпе иртнĕ. Унăн ĕçне Чăваш Республикин çутçанталăк ресурсĕсен тата экологи министрĕ Сергей Павлов, район пуçлăхĕ – депутатсен пухăвĕн председателĕ Валерий Шумилов, район администрацийĕн пуçлăхĕ Леонид Николаев тата ыттисем хутшăннă.
Патшалăхăн Вăрнарти сорт участокĕ ял хуçалăх культурисен тĕрлĕ сорчĕсене тĕпчет. Чи лайăххисене хуçалăхсене акма сĕнеççĕ.
«Янгорчино» производство кооперативĕн ертÿçи Геннадий Романов хĕрÿ тапхăрта мĕнле ĕçсем туса ирттерессине пĕлтернĕ. Хуçалăхра пĕрчĕллĕ тата пăрçа йышши культурăсем 660 гектар йышăнаççĕ. Çĕрулмие 55 гектар çинче çитĕнтереççĕ. Хальхи вăхăтра выльăх апачĕ хатĕрленипе пĕрлех кĕрхи культурăсене те выраççĕ. Вырмана 3 комбайн хутшăнать. Кашнине 220 гектар лекет.
Кооператив пурнăçпа тан пырать. Машинăпа трактор паркĕнче хальхи йышши комбайнсемпе тракторсем. Складсене тырă упрама хатĕрлесе çитернĕ. Кунта таса та типĕ. Йĕтем çинче те мĕн кирли пĕтĕмпех пур. Тырра тасатса типĕтмелли агрегатсене тĕплĕн тĕрĕсленĕ. Кăçал хуçалăхра тырă упрамалли икĕ склад тунă. Кĕрхи культурăсене акма вăрлăх çителĕклĕ. Лаптăка пĕчĕклетесшĕн мар, 300 гектара яхăн акса хăварасшăн.
Семинар-канашлăва пынисем уйсене çитсе килнĕ, тырă упрамалли складсене кĕрсе курнă.
Район администрацийĕн ял хуçалăхĕпе экологи пайĕн пуçлăхĕ Вячеслав Горбунов районти хуçалăхсен пĕрчĕллĕ тата пăрçа йышши культурăсене 17 пин гектар çинчен пухса кĕртмеллине пĕлтернĕ. Тĕрлĕ службăсен специалисчĕсем пухăннисене кирлĕ сĕнÿ-канаш панă.
Чăваш Республикин çутçанталăк ресурсĕсен тата экологи министрĕ Сергей Павлов, район администрацийĕн пуçлăхĕ Леонид Николаев аграрисене вырмана ăнăçлă ирттерме, тырпула тăкаксăр пухса кĕртме ăнăçу суннă.
Ĕнерхи кун тĕлне 7 хуçалăхра вырмана тухнă, 405 гектар вырнă. Малтан шутласа пăхнă тăрăх, вăтам тухăç 28 центнерпа танлашать.
Юрий КОРНИЛОВ.