23 июля 2016 г.
Вăрманкасри Алина Александрова Пĕтĕм Раççейри ял хуçалăх çыравне ирттерессишĕн пысăк яваплăха туйни паллă. Вăл ял çыннисене пĕлтерĕшлĕ мероприятие хутшăнмалли пирки курмассеренех ăнлантарать.
Телее кура, переписчик каланă тăрăх, хальлĕхе çырав ыйтăвĕсене хуравлама хирĕçлекен пулман-ха. Вăрманкас тата Мăньял Хапăс ялĕсемпе çирĕплетнĕ хăйĕн участокĕнчи 520 хуçалăхран çурри ытлархăшĕнче пулнă ĕнтĕ вăл. Хăшĕсем ĕçре, килте çук пирки каçсерен çÿреме тивет.
– Çынсем ăнланни савăнтарать. Ыйтусене хаваспах, туллин хуравлаççĕ, – пĕлтерчĕ Алина Айваровна.
Çынсенчен ыйтса пĕлнĕ даннăйсене переписчик кашни кунах пĕтĕмлетет, Чăвашстатăн районти пайне тăратать.
Статистика органĕн районти тĕп специалист-эксперчĕ Людмила Осипова пĕлтернĕ тăрăх, ĕнерхи кун тĕлне 21 хресчен-фермер хуçалăхне тата граждансен 8575 хуçалăхне, микропредприятин икĕ объектне, ял хуçалăх мар организацисен хушма хуçалăхĕн пĕр объектне, сад пĕрлешĕвĕн 36 объектне çырса тухнă. Вĕсем тытса пыракан пĕтĕмĕшле çĕр лаптăкĕ 7861,88 гектарпа танлашать. Выльăх-чĕрлĕх шучĕ çапла: ĕне-выльăх – 4017 пуç, сыснасем – 769, сурăх-качака – 4390, кайăк-кĕшĕк – 20616.
Инструктор участокĕсемпе илес пулсан, 1-мĕшĕнче çыравăн 48,29 процентне, 2-мĕшĕнче – 52,42, 3-мĕшĕнче – 52,26, 4-мĕшĕнче – 51,75, 5-мĕшĕнче – 58,34, 6-мĕшĕнче 44,24 процентне пурнăçланă.
Светлана ЧИКМЯКОВА.