23 июля 2016 г.
Июлĕн 10-мĕшĕнче Крым çĕрĕ çинче – çар мухтавĕн хулинче, Севастопольте, – Пĕтĕм чăвашсен Акатуйне Вăрнар район артисчĕсем те хутшăннă.
Валерий Шакртов ертсе пыракан ветерансен хорĕ маларах Тинĕс бульварĕнчи Нахимов площадĕнче концерт кăтартнă. Акатуя уçнă кун хăнасене чăваш тата вырăс юррисем парнеленĕ. Чăваш наци культурине упранăшăн тата аталантарнăшăн, регионсем хушшинчи çыхăнăва çирĕплетнĕшĕн Севастопольти чăваш наци-культура пĕрлешĕвĕн Хисеп грамотине тивĕçнĕ.
Районти культура çурчĕн директорĕ Светлана Журавлева пĕлтернĕ тăрăх, концерт программине хутшăннисĕр, экскурсисенче пулнисĕр пуçне вăрнарсене аякри регионта хамăр ентешсене курни питĕ савăнтарнă. Чылайăшĕ Вăрнарти 29-мĕш училищĕрен вĕренсе тухнă та ку тăрăхра тĕпленнĕ. Зоя Белякова артистка акă хăйĕн виççĕмĕш сыпăкри тăванĕсемпе нумай çул иртнĕ хыççăн тĕл пулнă. Вăрнар тата Севастополь чăвашĕсем нумайччен пĕр-пĕринпе ăшшăн калаçнă, чылай пулăма аса илнĕ.
Светлана ЧИКМЯКОВА.