20 июля 2016 г.
Районта вырма ĕçĕсем пуçланчĕç. Июлĕн 17-мĕшĕнче «Луч» хуçалăх уй-хире пĕрремĕш тухрĕ. Ку ял хуçалăх предприятине çĕр ĕçне чунтан парăннă çын Вячеслав Ижелеев ертсе пырать. Кĕрхи культурăсем кунта 250 гектар йышăнаççĕ.
Вырма ĕçне пуçăннă ятпа хуçалăх ертÿçине район администрацийĕн ял хуçалăхĕпе экологи пайĕн начальникĕн заместителĕ В.Шашкин тата «Агро-инноваци» предприятин директорĕ Е.Алексеев саламланă. Вĕсем ертÿçĕпе коллектива палăртнă тĕллеве ăнăçлă пурнăçлама тата уй-хирти тырпула тăкаксăр пухса кĕртме ăнăçу суннă.
Уйра икĕ «ACROS» комбайн ĕçлет. Штурвал умĕнче – опытлă, хăйсен ĕçне лайăх пĕлекен комбайнерсем. Вĕсем хальхи йышши техникăпа çаврăм хыççăн çаврăм тăваççĕ, уй-хире тырпултан тасатаççĕ.
Хуçалăх ертÿçи В.Ижелеев пĕлтернĕ тăрăх, çумăр çуманнине пула «Московская – 39» тулă тухăçĕ самаях чакнă. Çавăнпа та кашни гектартан çирĕм центнер ытларах кăна илессе шанаççĕ. Уй-хирти тырпула çийĕнчех йĕтем çине илсе çитереççĕ. Хуçалăхра вырмана тĕплĕн хатĕрленнĕ: тырă упрамалли складсене тасатнă, типĕтмелли агрегатсене тепĕр хут тĕрĕсленĕ. Специалистсене те тупса çирĕплетнĕ.
Хуçалăхра пĕрчĕллĕ тата пăрçа йышши культурăсене 837 гектар çинчен пухса кĕртмелле.
Карл Маркс ячĕллĕ хуçалăхра 60 гектар пăрçа çулнă, ытларикун кĕрхисене вырма тухнă.
Юрий КОРНИЛОВ.