20 июля 2016 г.
Санкци таварĕсене тĕп туни юлашки вăхăтра, чăнах та, нумай калаçу çуратрĕ. Мĕн пытармалли – сивлекенсем те çук мар. Тÿрех калам, чикĕ урлă саккуна пăсса илсе килнĕ апат-çимĕç чи малтанах контрабанда шутланать. Унăн вара пахалăхĕ питĕ иккĕленÿллĕ. Эппин, вăл çыншăн хăрушсăр тееймĕн.
Раççей Федерацийĕн Президенчĕн «Раççей Федерацине хăрушсăрлăхпа тивĕçтерес тĕллевпе усă курмалли ятарлă экономика мерисем çинчен» Указа пурнăçланă май, кăçал 5000 яхăн тонна саккунсăр ÿсен-тăран продукцине тытса чарнă, çав шутран 4630 тоннине тĕп тума тивнĕ. Çавăн пекех выльăх-чĕрлĕх продукцийĕн контрабандин çулне те пÿлнĕ: 244 тоннăран 182-шне утилизациленĕ.
Çак цифра эрнесерен улшăнса тăрать. Раççейĕн пур кĕтесĕнче те тенĕ пекех саккунсăр тавар сутнине тупса палăртаççĕ Россельхознадзор специалисчĕсемпе пĕрле Роспотребнадзор тата Прокуратура, Таможня ĕçченĕсем.
Пирĕн тăрăхра та йĕркене уяман усламçăсем тупăннă. Акă çулталăк пуçламăшĕнче Шупашкарти «Николаевский» суту-илÿ комплексĕнче 100 килограма яхăн Польшăран илсе килнĕ панулми куç тĕлне пулнă. Вĕсене Раççей Президенчĕн çÿлерех асăннă тата 2015 çулхи июнь уйăхĕн 24-мĕшĕнчи указĕсемпе килĕшÿллĕн тĕп тунă.
Çĕрпÿ районĕнчи «Çавал» базăра тупнă 95 кг панулмие те çак «шăпах» кĕтнĕ. Ку парти те Польшăранах пулнă. Елчĕк районне те çитнĕ çак çĕршыв çимĕçĕ.
Турци помидорĕсене Вăрмар тата Елчĕк районĕсенче асăрханă. Унта та, кунта та йывăр техника урапи айне пулнă вĕсем.
Çавăн пекех саккуна пăсса илсе килнĕ иçĕм çырлин курупкисем те çĕрпе танлашнă.
Надежда ВАСИЛЬЕВА,
Россельхознадзорăн Чăваш Республикинчи тата Ульяновск облаçĕнчи управленийĕн ĕçченĕ.