13 июля 2016 г.
Вăхăт кĕтмест, малаллах шăвать. Сисейместпĕр те – вырмана та тухмалла пулĕ. Çакна шута илсе районти чылай хуçалăх «уй-хир карапĕсене» юсама пуçланă. Малтан пăхнă тăрăх, хĕрÿ тапхăрта 55 комбайн уй-хире тухмалла.
Техникăна вырмана хатĕрлес ĕçсем мĕнле пынипе паллашас тĕллевпе район администрацийĕн ял хуçалăхĕпе экологи пайĕн специалисчĕсем малти хуçалăхсенчен пĕрне – «Санары» агрофирмăна çитсе килнĕ. Кунта юсав ĕçĕсене лайăх йĕркеленĕ. Комбайнерсем хăйсене шанса панă техникăна тепĕр хут тĕплĕн тĕрĕслесе тухаççĕ, кивелнĕ хăшпĕр пайĕсене çĕннисемпе улăштараççĕ тата ытти ĕçсене те пурнăçлаççĕ.
«Санары» агрофирмăра вырмана 5 комбайн хутшăнĕ. Тĕштырăпа пăрçа йышши культурăсене 830 гектар çинчен пухса кĕртмелле. Агрофирма ертÿçи Роберт Петров комбайнерсем юсав ĕçĕнче пысăк тимлĕх кăтартнине, кашниех яваплăха туйнине палăртнă. Вĕсем пурте ĕç кăтартăвĕ коллективран килнине аван ăнланаççĕ.
Патшалăхăн техника тĕрĕслевĕн инспекцийĕ хатĕрленĕ графикпа килĕшÿллĕн, комбайнсене вырмана мĕнле хатĕрленине июлĕн 15-мĕшĕнчен пуçласа пăхса тухма тытăнаççĕ.
Юрий КОРНИЛОВ