13 июля 2016 г.
Çемье, юратупа шанăçлăх кунĕнче районти чи лайăх çемьесене чысласси ырă йăла пулса тăчĕ
Вăрнарти Абашевсемшĕн çак кун уйрăмах пĕлтерĕшлĕ пулчĕ. Елизавета Васильевнапа Леонид Никифорович шăпах 55 çул каялла июлĕн 8-мĕшĕнче пĕр çемьене чăмăртаннă. Хăйсем калашле, çак самант ĕнер кăна пулнă пек. Вăрнар каччипе Упнер хĕрĕ хими завочĕн клубĕнче йĕркеленĕ спорт каçĕнче паллашнă. Иккĕшĕ те çамрăк пулнă: Леонид Никифорович – 18-та, Елизавета Васильевна – 19-та. Икĕ çултан туй кĕрлеттернĕ, çулталăкран ывăла кун çути парнеленĕ. Хыççăн çемье пуçне Совет çарне илнĕ. Салтак аттине хывсан вăл Чăваш патшалăх ял хуçалăх институтĕнче куçăмсăр майпа инженер-механик профессине алла илнĕ. Çав вăхăтрах Вăрнарти хими заводĕнче тăрăшнă. Слесарьтен цех механикĕ таран ÿснĕ.
Елизавета Васильевна та ку предприятирех тăрăшнă. Малтан ширпотреб цехĕнче, хыççăн, Щелковăри химипе технологи институтĕнче техник-технолог специальноçне илсен, ăна смена мастерне куçарнă.
Мăшăр яланах кăтартуллă тимленĕ, çакна çирĕплетекенни – ĕçри çитĕнÿшĕн панă чылай-чылай наградăсем. Вăл шутра – спортра çĕнсе илнисем те вуншар.
Кунран та пысăк телейĕ вĕсен – ывăлĕпе хĕрĕнче, тăватă мăнукĕнче тата пилĕк кĕçĕн мăнукĕнче.
Кивçурт Енĕшри Нина Алексеевнапа Николай Алексеевич Алексеевсен те мухтанмалли пур. Юратăва тата шанăçлăха вĕсем 57 çул упраççĕ. Икĕ ывăлпа виçĕ хĕр пăхса çитĕнтернĕ. Халĕ вунă мăнукĕпе савăнса пурăнаççĕ.
Николай Алексеевича районта аван пĕлеççĕ. Вăл район агропромышленность комплексне аталантарассине курăмлă тÿпе хывнă. Пĕр вăхăт партин Вăрнар райкомĕн инструкторĕ пулнă, анчах та пурнăçĕн пысăк пайне çĕр ĕçĕпе çыхăнтарнă. Нумай çул вăл «Звезда» колхозăн тĕп агрономĕ пулнă, ял хуçалăх культурисен тухăçĕпе хуçалăха чи малтисен речĕпе пырассине пысăк тÿпе хывнă.
Нина Алексеевна, Красноармейски районĕнчи Пайсупин хĕрĕ, уншăн пысăк тĕрев пулнă. ,мĕрĕпех вăл шкулта ачасене вырăс чĕлхипе литературине вĕрентнĕ: малтан – Сăкăтра, кайран – Енĕшре.
Ял-йышра хисепре. Ачисем те ашшĕ-амăшне хывнă, вĕсем те пуриншĕн те – ырă тĕслĕх.
Пăртасри Кузнецовсен те çемье историйĕнче паллă самантсем чылай. Нумаях пулмасть, июнĕн 14-мĕшĕнче, вĕсем ахах туя паллă тунă. Иккĕшĕ те ку ялтах çуралса ÿснĕ, çавăнпа та пĕр-пĕрне аван пĕлнĕ.
Сергей Петрович – ăста водитель. ,ç стажне Мичурин ячĕллĕ хуçалăхра пуçланă. Вунçичĕ çул Канашри пассажир автотранспорт предприятийĕнче автобус водителĕнче тимленĕ. Кăтартуллă ĕçшĕн Хисеп хучĕсемпе Тав çырăвĕсене чылай тивĕçнĕ. Халĕ вăл Пăртас ачисене шкул автобусĕпе турттарать.
Елена Тарасовна çемьелениччен Шупашкарти пĕр ача садĕнче воспитательте тăрăшнă. Ăсталăхне темиçе хутчен те «Çулталăкри чи лайăх воспитатель» конкурсра тĕрĕсленĕ. Мăшăрланса яла таврăнсан Вăрнарти çĕвĕ фабрикинче тимленĕ, вăл хупăнсан 19 çул – Вăрнар район тĕп больницинче. Çав тери хастар çын, тĕрлĕ конкурссенче яланах пуçару кăтартнă. Халĕ – район администрацийĕн хуçалăх пайĕн заведующийĕ.
Ывăлĕпе хĕрĕ ашшĕ-амăшĕ пекех маттур пулма тăрăшаççĕ.
Çемьесене саламланă май, район администрацийĕн пуçлăхĕ Леонид Николаев, Вăрнар чиркĕвĕн настоятелĕ Александр атте, ЗАГС пайĕн пуçлăхĕ Татьяна Филиппова çемье чи хаклă пурлăх пулнине, çемьене юрату, шанăçлăх, ĕненÿ кăна çăлнине, «Юратупа шанăçлăх» медале тивĕçнĕ Абашевсем, Алексеевсем, Кузнецовсем вара районти ытти вун-вун çемьешĕн ырă тĕслĕх пулнине палăртрĕç. Вĕсен ячĕпе «Салам» ушкăн, ача-пăча ÿнер шкулĕнче вĕренекенсем пултарулăх номерĕсене парнелерĕç. Ăшă сăмахсем янăрарĕç, чĕресем хаваслăрах тапрĕç.
Светлана ЧИКМЯКОВА.