06 июля 2016 г.
Ирхи сакăр сехет пулин те Ярмушкари ветеринари участокĕн çуртĕнче пĕр çын та курăнмарĕ. Ольга Владимирова заведующи пÿлĕмре пĕчченех. Ăна пĕрремĕш хут куртăм пулин те, ырă кăмăлĕпе, сăпайлăхĕпе тыткăнларĕ. Калаçу та çăмăллăн йĕркеленсе кайрĕ.
– Çу кунĕнче ĕç нумай, çавăнпа халĕ ял çыннисем сайраран çеç кĕрсе тухаççĕ. Тепĕр тесен, кашнин тенĕ пек кĕсье телефонĕ пур. Выльăх тĕлĕшпе пĕр-пĕр ыйту сиксе тухсан килтен тухмасăрах шăнкăравласа пĕлме майсем çителĕклĕ, – ăнлантарчĕ Ольга Ивановна.
Ĕç опычĕ пуртан ăна-кăна лайăх тавçăрать, ял çыннине те кирлĕ сĕнÿ-канаш пама пултарать. О.Владимирова выльăх-чĕрлĕхе сиплес ĕçе чунтан парăннă. 1984 çултанпа ветеринарта ĕçлет те – ку таранччен миçе çыннăн выльăхне сыватман-ши; Шучĕ те çук. Халĕ те çаплах. Выльăх-чĕрлĕх сасартăк чирлет-и е йывăр пăрулать – тÿрех ун патне пыраççĕ, пулăшу ыйтаççĕ. Ольга Ивановна нихăçан та хирĕçлесе тăмасть, хăйне чĕнекен патне васкавлăн тухса каять. Шанăçа тÿрре кăларасси тĕп тивĕç пулнине самантлăха та манмасть: йĕри-таврари сакăр ял çыннисен выльăхĕсемшĕн яваплă-çке вăл. Чăн та, заведующие пулăшакан та пур: Леонид Федоров ветеринари фельдшерĕн тивĕçне пурнăçлать. Иккĕшĕ пур тĕрлĕ профилактика ĕçĕсене вăхăтра туса ирттереççĕ.
– Пирĕн тăрăхра килти хушма хуçалăхра выльăх-чĕрлĕх тытакансен йышĕ пысăк. Хăшĕ-пĕрисем тăватă е пилĕк ĕне усраççĕ. Çавăнпа та ĕçсĕр ларма вăхăт çук, – терĕ О.Владимирова.
Йытăпа кушака та прививка тума тивет. Ку ĕçе пурнăçлама кашни киле кĕмелле. Ольга Ивановна кам ăçта пурăннине, миçе выльăх тытнине лайăх пĕлет. Уншăн вăл е ку çынна шыраса тупасси йывăрлăх кÿмест.
Хальхи вăхăтра тепĕр ĕç те пурнăçлаççĕ: ирсерен час-часах сĕт пахалăхне тĕрĕслеме тухаççĕ. Ятарлă агрегат пур. Вăл сĕтри çу хисепне тĕрĕс кăтартса парать. Çавăн пекех ĕнене искусствăлла майпа пĕтĕлентерессине йĕркелесе янă. Л.Федоров ветеринари фельдшерĕ хăйĕн çăмăл машинипе çывăхри ялсене пĕр чăрмавсăр çитсе килме пултарать. Чĕнсен çийĕнчех çула тухать, канмалли кун пулнине те пăхса тăмасть.
– Выльăх-чĕрлĕхе тĕрлĕ чир-чĕртен сыватнисĕр пуçне хут ĕçĕпе те ларатăп. Районти ветеринари станцине уйăхсерен отчет тăрататпăр. Миçе ĕне чуптарнă, миçе выльăха сыватнă – пĕтĕмпех хут çине çырăнать. Чăннипе каласан, бухгалтер та пулмалла. Пире тĕрĕслекенсем вара çителĕклех. Тĕрĕслев вăхăтĕнче документсем кирлĕ шайра маррине тупса палăртсан штраф та параççĕ. Çитменлĕхсем ан пулччăр тесен ĕçе тĕплĕн тума тивет, – тăсрĕ калаçăва заведующи.
О.Владимирова Вăрнарти совхоз-техникумра ветеринари фельдшерĕн профессине алла илнĕ. Ярмушка участокĕнче ĕç пуррине пĕлнĕ те – кунта килнĕ. Çавăнтанпа ку тăрăхри выльăх-чĕрлĕхе куçран вĕçертмест, ветеринари службинче сыхă тăрать. Хастарлăха чакармасть. Хăйĕн пĕлĕвне, квалификацине май пур таран ÿстерсе пырать. ,çлеме условисем çук мар. Виçĕ çул каялла çурта çутçанталăк газĕ кĕртнĕ. Унчченхи çулсенче вара кăмакана вутăпа хутса ăшăтнă.
Ольга Ивановна ĕçе юратса пурнăçлать. Çынсем ăшă сăмахсем калани хавхалану хушать. Яваплăх пысăкки вара тимлĕхе ÿстерме хистет. Çирĕплĕхе чылай туптанăран нихăçан та пуçа усмасть, йывăрлăхсене май пур таран çĕнтерсе пырать.
Юрий КОРНИЛОВ