06 июля 2016 г.
Чулхула облаçĕнчи Дивеево районĕнчи Яковлевка салинчи пĕр хуçалăхра вилнĕ сыснана лаборатори тĕпчевĕ тунă хыççăн унра африка чумин вирусĕ пулнине палăртнă.
Хăрушă чир района та çитессинчен асăрхаттарса выльăх-чĕрлĕх чирĕсемпе кĕрешекен районти станци халăха çав тери тимлĕ пулма ыйтать, сыснасене апат-çимĕç юлашкийĕсене пĕçермесĕр çитерме юраманнине аса илтерет.
Станци пуçлăхĕ Владимир Матвеев пĕлтернĕ тăрăх, апрельте ветспециалистсем шкулсенче тата ача сачĕсенче ĕçлекенсемпе ку чир хăрушлăхĕ, учрежденисенчен пăшăхтарман апат-çимĕç юлашкисене халăха салатса пама юраманни пирки калаçусем ирттернĕ. Сыснасен африка чумине асăрхаттарассипе мерăсем йышăнасси пирки алă пустарнă.
Çак уйăхра ветеринарсем ятарлă вĕренÿре ăс пухнă, май уйăхĕнче ку енĕпе аттестаци витĕр тухнă.
Владимир Матвеев сысна пуçне кашни кун шута илнине палăртрĕ. Хальлĕхе 4690 сыснана биркăланă. Июнĕн 1-мĕшĕ тĕлне сысна классика чуминчен 18941 пуçа, шыçă чирĕнчен 14888 пуçа прививка тунă. Уçă çутçанталăкри тата килти сыснасене тĕрĕслеме тытăннă. Паянхи куна 60 проба илнĕ.
Африка чумине района кĕртес мар тесе полицин «Вурнарский» пайĕн çул-йĕр инспекторĕсемпе пĕрле чĕрĕ сыснасене, сысна продукцине, ун валли апат турттарнине тăтăш тĕрĕслеççĕ, пасарсенчи суту-илÿ вырăнĕсем асăрхавра.
– Сысна ĕрчетекен «Луч» хуçалăха тата Вăрнарти аш-какай комбиначĕн ертÿçисене чиртен çирĕп сыхланма асăрхаттарнă. Мĕнпур категорири ку выльăха хупса усрамалла, – асăрхаттарать выльăх-чĕрлĕх чирĕсемпе кĕрешекен станци пуçлăхĕ.
Ветеринарсем килти тата хир сыснисем мĕнрен вилнине çийĕнчех палăртассипе лаборатори тĕпчевĕсем ирттереççĕ, биологи каяшĕсене вăхăтра утилизацилеççĕ.
Светлана ЧИКМЯКОВА.