06 июля 2016 г.
Тăван ялта, Уйкас Кипекре, пирĕн урамри çуртсем пĕр енче çеç вырнаçнăччĕ. Çавна пулах ял-йыш ăна «Хăрах урам» тетчĕ. Юлашки çулсенче урамăн тепĕр енче те çуртсем çĕкленчĕç.
Иртнĕ ĕмĕрте кунта Анани мучипе карчăкĕ пурăннă. Ывăлĕ Кĕркури колхоз йĕркеленĕ ĕçе хастар хутшăннă. Çитĕнсе тĕрекленсен вăл Красноармейски районĕнчи Çĕнĕ Йĕкĕтри Евтука качча илет. Кĕçех вĕсен ывăл ача çуралать. Анчах телейлĕ пурнăçа вăрçă татать. Кĕркурине фронта илсе каяççĕ. Мăшăрĕ кăкăр ачипе тăрса юлать. Евдокия Егоровнана уй-хир бригадин бригадирĕ пулма суйлаççĕ. Яваплăха туйса, ывăннине пĕлмесĕр вăй хурать. Кĕркурин 1943 çулхи январĕн 10-мĕшĕнче Ростов облаçĕнчи хаяр çапăçура пурнăçĕ вăхăтсăр татăлать.
Евдокия Егоровна ертсе пыракан бригада вăрçă çулĕсенче те, ун хыççăн та йывăрлăхсене çĕнтерсе çитĕнÿ хыççăн çитĕнÿ тунă, малтисен ретне тухнă.
Ывăлĕ, Валерий Григорьевич, колхоз ĕçне хастар хутшăнать. 40 çул ытла механизаторта ĕçлет. Ашшĕсĕр çитĕннĕ пулин те пурнăç çулне тĕреклĕ утса тухрĕ. Ĕçри хастарлăхĕшĕн ăна орденпа тата медальсемпе чысланă. Вăл темиçе хут депутат, парти райкомĕн бюро членĕ пулнă. Тивĕçлĕ канăва тухсан, колхоз Валерий Григорьевича çĕнĕ трактор парнеленĕ. В.Ананьевпа мăшăрĕ Галина ачисене çитĕнтерсе тикĕс çул çине тăратнă.
Ананьевсен йăхне пĕтĕм ял-йыш хисеплет.
Вениамин ИВАНОВ.
Уйкас Кипек.